Gasuapara NGO-rang galchipe donenggipa fishery office-ko taripile on•china dabia 

Baghmara, Nov 17, 2022: South Garo Hills a•jao donggipa Gasuapara jolni NGO-rang aro Joint Action Committee (JAC) baksa bakrime Butbar salo ru•uta bilsirangna galchipe dongenggipa Fishery Pump Aquaculture office aro Quater Nokko nieaha.

Ua galchipe dongenggipa Fishery pump-rangko namedake A•dok Sorkari chu•gimik jako ra•pile kamrangko ka•genchimode, songdongenggipa manderangna bang•a dakchakani ong•genchim ine NGO-rang janapataha.

NGO-rangni u•iatani gitade, ia fishery office-ko bilsi 40 mangna skang rikgenchimoba, nirok simsakgija donani a•sel, jolni manderang maming dakchakaniko man•jaha aro indake galchipe donanichi sorkarini fund-rangko indin gimaataha ineba janapataha.

Ua office-o nirok simsakgipani kamrangko ka•giparang, jekai Demonstrator aro chowkidar-rangni nokrangkoba ru•uta bilsirangna maming taridapa gri galchipe donenga.

Uni gimin Gasuapara jolni nangrimgimin NGO-rang galchipgimin Gasuapara Fishery-ni pump-rang, office nok aro kam ka•giparangni dongchakani nokrangko ta•rake taridape on•china aro NGO-rangni dabianiko chu•sokate on•pachina a•dok sorkariko mol•molataha.