Deputy Skotong Minister a•songni nisanko badalate chang 76-gipa jakgitelani salko Tura-o manidilanga
Tura, August 15, 2022: India a•song gimikon chang 76-gipa India a•songni jakgittel ong•ani salko maniengon, Garo Hills-ni dingtang dingtang district headquarter-rang aro Sub Division-rango maniangaha. Indake West Garo Hills a•jani skotong songjinma Tura-o a•dokni Dakchakgipa Skotong Minister Preston Tynsong India a•songni jakgittelani salko maniangaha.
Meghalaya a•dokni Dakchakgipa Skotong Minister Prestone Tynsong, New Tura Kal•chakram biapo a•songni nisanko badale in•angengon, dol 13 Parade Contingent-rang Rashtriya Salute-ko dakangaha.
Indake 2nd MLP Battalion Tura Goeragre-ni DEF, Tura Government Kolege-ni National Cadet Corps (NCC) me•a aro me•chikrang, Don Bosco Kolege, Don Bosco Higher Secondary Skul, Pechon Memorial Skul, St. Marys’ Skulni Scouts Troop aro Guide Company, 2nd MLP Battalion-ni Band Party-rang bakko ra•e, 13-gipa parade contingent-rang, Marching Contingent-ko West Garo Hills a•jani Deputy Superentindent of Pulis aro Parade Commander Walsang Momin re•dilangaha.
West Garo Hills a•jani Deputy Commissioner, Swapnil Tembe, Additional Deputy Commissioner, Extra Assistant Commissioner, aro Superentindent of Pulis VS Rathore aro bang•a Department-ni Officer-rang, senior citizen-rang, skulni Principal-rang, Skigiparang aro poraienggipa chatro chatrirang bakko ra•angaha.
Presto Tynsong dal•batgipa sokgipa ong•e, jinmana aganprakengon, India a•songni gitcham dilgiparang Mahatma Gandhi, Pandit Jawaharlal Nehru, Sardar Vallabhai Patel aro Subhas Chandra Bose India a•songni jakgitelanina krenge kamko ka•ahani gimin uamangko demitelle aganangaha. Unbaksana ua a•dokni matgrikrang Pa Togan Nengminja, U Tirot Sing, U.Kiang Nangbah a•songna on•kange kam ka•aniko gisik ra•e demitelangaha.
Unbaksana batanggimin jarango mikka jimbee waani a•sel janggitangko gimaatgipa nokdangni manderangna suk ong•gijaniko aro ka•a be•aniko parakangajolaha.
Uasan ong•aigija Deputy Skotong Minister, a•doko tom•tomaniko ra•bana aro bobil dolko warachaksoenggipa pulis dolrangkoba de•mitelangaha. Pulis Infrastructure Renovation Fund-ko a•dok sorkari ra•chakaha. Indake pulis dolrang ia renovation fund-ko ra•chakanichi pulis station, fire station aro battalion headquarter-rangko taridapna cholko man•gnok. Ia kamko ta•rake matchotatna gita a•ja ge•antini Deputy Commissioner aro Superentindent of Pulisko, Member Secretary donne lak 50 tangkarangko a•ja ge•antinan chamangaha.
Meghalaya a•dok sorkari sima arini kajia golmalko namatna rakbee kamrangko ka•enga. Indake bang•a tom•aniko ong•atani jamano March 29 tariko Union Home Minister-ni mikkango MoU-ko soi ka•aha. Indake soi ka•ani ja•mano a•dok damgnini ge•dok songrangko Survey of India-ni dongpaanichi joint survey-ko ong•atangaha ineba Tynsong aganangaha.