Shillong, April 18, 2022: Tamil Nadu a•dokni saksa Tennis kal•na changgipa rang•gitik ramao a•sel ong•e janggitangko gimaataha.
Uni rang•gitik a•sel ong•e sianina Meghalaya Table Tennis Association (MTTA)-ni manderang duk ong•aniko parakataha.
Koborna u•iatani gitade, Deenadayalan Vishwa Meghalaya a•doko ong•atenggipa chang 83-gipa National Table Tennis Championshipo bakko ra•na gita re•baengachim. Indiba Deenadayalan Vishwa aro gipin sakgittam ripengskarang R Santosh Kumar, D Kishore Kumar aro S Abhinash Prasannaji Robibar salo Guwahati songjinmaoni Shillong songjinmaona gari reserve ra•e re•baengachim. Uamang Robibar salni 1:20 bajimango Ri-Bhoi a•jani Shangbangla songona sokahaon chakka ge-12 donggipa truk gari rama jatchiko re•sotmiting somoio uamangni re•baenggipa Taxi gariko nangtingeaha. A•sel ong•ani bakan uamangko Nongpoh Civil Hospital-ona ra•angahachim, indiba rasong gribee Deenadayalan ramaon janggi galaha. Unbaksa re•bagipa sakgittam manderangko Nongpoh Civil Hospital-ona ra•angani ja•mano NEIGHRMS Hospital-ona ra•angskaha aro uamang ke•gnioni naljokaha ine dokdor parakataha.
Sianggipa mandeni pagipa aro nokdangni manderang Sombar salo Nongpoh-ona re•bae uni manggisiko ra•anggen. Uni sianina MTTA-ni membor sakgni Nongpoh-o dongenba chu•gimik kamrangko matchotate sianggipani pagipa aro nokdangni manderangko Guwahati Airport-oniko rime ra•egen ineba u•iataha. Indake Ri-Bhoi a•jani administration sianggipa manggisiko Chennai-ona watatpilanio dakna nanggni kamrangko ka•enggen.
MTTA-ni Vice President Bruce P Marak, aro General Secretary Chiranjib Choudhury sianggipani ma•gipa pagipa aro pilak nokdangni manderangna ka•dimeani kattarangko parakataha.