Tura, April 19, 2022: Garo Students Union Central Executive Committee (CEC) dolni President Zikku Balgra N Marak re•baenggipa 22 tarik o MoU ko jegalna ine ong•atenggipa rally na chugimik chakpaaniko aro dakchakaniko on•a ine monggolbar salni bak o koborna u•iataha.
“Garo Hills ni bang•a NGO dolrang Skotong Minister Conrad Sangma ni soi kagimin MoU ko jegalna ine ong•atenggipa rally GSU (CEC) dolni karimskarang bakko ra•anggen. MoU ko jegalna Garo Hills ni pilak manderangan ku•mong nangrime melie kamko ka•na nanga. Chinga MoU ko jegalna gipin NGO dolrang baksa apsan ja•ku ga•e kamko kaanggen. Chinga GSU dolni karimskarang A•chik jatko galchipjawa aro nangan somoio uamang baksa apsan chadenge dakchakaniko on•gen” ine GSU CEC ni President Zikku Balgra N Marak aganaha.
Ua GSU ni bang•a Zone ni karimskarangkoba ia tom•bimonganiona re•bae bakko ra•angchina molmolangaha.