Tura, April 18, 2022: West Garo Hills a•jani District Medical and Health Officer (DM & HO), Selsella C&RD Block-ni ning•o donggipa Khasiabari songo April 18 tarik Sombar salo Block Health Mela-ko ong•atangaha.
Ia Health Mela-ona WGH a•jani DM&HO Dr. Bijoy Debbarma mongsonggipa sokgipa ong•e bakko ra•angaha. Ua Health Department-ni on•enggipa dakchakanirangko aro scheme-rangni bidingo agan talatangaha aro WGH a•jani ning•o donggipa dingtang dingtang Block-rango April 18 tarikoni 22 tarikona Health Mela-rangko ong•atanggen ineba aganangaha. Ua manderangko Covid sabisina tikka su•china gitaba didiangaha aro MHIS-ni dakchakanirangko ra•rikchinaba aganangjolaha.
Bhaitbari PHC-ni Medical and Health Officer, Dr Pritam Das Block Health Mela-ni gamchatani gimin jinmana aganprakangskaha.
Indake ong•engon, Additional DM&HO Dr. Jakrambal A Sangma aro Selsella-ni CDPO Madonna T Sangma-ba ia melao bakko ra•angaha.