TMC-ni ong•atgipa Indepence Cup-ni bon•kamgipa kal•susaani tom•tome matchotanga

Tura, Aug 23, 2022: TMC-ni South Tura-o ong•atanggipa, Independence Cup-ni bon•kamgipa kal•susaaniko Sombar attamo New Tura Kal•chakram biapo ong•atangaha.

Ia Independence Cup-na kal•susaanio dolgni kal•giparanga, Modynagar baksa Dakkopgre kal•susaangaha. Dolgni ia kal•suaanio krengbee doltangko cheatna kal•susaangaha, indiba dolgnian apsangrik ong•e, bon•kamao penalty tingsusaani ong•aha aro penalty tingsusaanio Modynagar, Dakkopgre-ko 5-4 goalchi amataha.

Ia kal•susaanio gitcham District Horticulture Officer aro da•o ong•enggipa Tura Masson Phillips Acadamy-ni dilgipa Meril N.Sangma mongsonggipa sokgipa ong•e bakko ra•angaha.

Unbaksana TMC-ni dilgiparanga MPTCC-ni General Secretary incharge Garo Hills Mukul Das, TMC West Garo Hills-ni Convenor Richard M.Marak, Coordinator Sapford N.Sangma, Tura-ni gitcham MDC Rupert M.Sangma, Adamkid Sangma, North Tura TMC Block President Rollingstone Momin, Babelapara Hr. Sec. Skulni Principal Tarun Saikia aro South Tura TMC-ni Zonal Convenor Chongsin D.Shira dongpae bakko ra•angaha.

Indake kal•susaanio chegipa dolna Meril Sangma-ni jakchi throupe-ko on•angaha.