Tura, August 23, 2022: Dadenggre elekkani manderang pangnan politician-rangni cha•bokako man•ne janggi tangbaenga ine GSU Western Zone (North) Dadenggre-ni President Tengsan M Marak parakataha.
“Chinga Dadenggre jolo manderangni neng•nikaniko bang•a dilgiparangna u•iataha, indiba dilgiparang chingni neng•nikanirangko namatna maming ja•kuko de•ja. Chinga elekkatangni MLA James Pangsang K. Sangma-na ia obostarangni bidingo u•iatahachim, indiba ua maming namdapaniko on•jaha. Chinga 1999 bilsionin Dadenggre Civil Sub-Division-ko District songe on•china dabienga, indiba chingni dabianiko da•alona kingkingba chu•sokate on•kuja. Dadenggre Civil Sub-Division-ni rama jallangrang, skul nokrang aro office-rang maming tang•dodapani dongja. Ua Chadamberangna kal•susaanirango aro doka dam•anirango chu•sokatna dakchakahama, mamingan dongja. Anga Dadenggre elekkani MLA James Sangma-ko jera ra•na ka•donga, ua badita chang elekkatangko re•bae niaha, badita chang manderangni neng•nikanirango dakchakaha. Ua 2018 bilsioni 2022 bilsiona kingking Dadenggre jolna maming kamrangko ka•kuja, songna badita ge gital scheme-rangko ra•bae on•aha, badita ge kolege-rangko ra•baha, songni ge•samang CHC-na badita ge ambulance-rangko on•aha” ine Tengsan Marak, James Sangma-o sing•doangaha.
Dadenggre jolni manderang nama kamrangko man•pana kusi ong•a, indiba chingni kusi ong•a pangnan indin ong•gramaia ineba ua janapataha.