Ampati, Aug 23, 2022: Bangladesh a•songona rong•te salruraenggipa A•chik driver saksako gipin jat driver-rang Mahendraganj-o buduchi kae dokaha ine AHAM South Western Zone-ni General Secretary Wester Ch.Sangma u•iataha.
Rong•te salruraenggipa A•chik driver Shillong-ni Ma Evaliny Kharbani-ni ning•o donge Bangladesh-ona rong•te salengachim. Ua re•anggipa August 11 tarikni pringchibara gari an•pilmittingo ge•gipin Dumper gari ML-08H-7922-ko nangatani gimin gipin jat driver-rang wa•a binekpile dokenba sal rakao chola ba•ra oke buduchi jakpangpil kae gari mikkango adita kontarangna donaha aro ua ong•a obostako nikgipa gipin jatrang aro Evaliny Kharbani-ni Manager, Mahendraganj pulisna kobor on•ani pal batesa donnuna jotton ka•aha.
Doka man•gipa driver-ni u•iatani gitade, uni janggilo bang•bate mata buako man•aha aro mikrono saknaako man•ne nikanirang komiengaha.
Uni gimin uandakgipa on•tisa a•selna, A•chik jatni kosako ong•gija jak sokaniara chanchina changgijagipa matburingni kam ong•a ine AHAM jegalataha.
Maina rong•te salgipa driver-skarangni indakgipa kamara dal•a gualani ong•a. Niam gita ua obostako Pulisrangna kobor on•na nangachim ine AHAM dilgipa suk ong•gijaniko parakataha.
Uni gimin ua obostao jerangan jak dongachim, niam gita uamangko rim•e sastirangko on•na nangchongmota aro Exporter Association-ni dilgiparang niroke kamrangko ka•na nanga, jedakode mikkangchi iandakgipa a•selrang ong•taijawa ine Wester Sangma janapataha.