Shillong, July 21, 2022: Trinamool Congress (TMC) dolni dilgipa George B Lyngdoh, SSA skigiparangni palo a•songni Cabinet Minister, Dharmendra Pradhan-na lekka sedoataha.
TMC dol gimik cholko ra•enba SSA skulo skigiparangna dakchakaniko on•na krengenga. Indake TMC dolni dilgipa George B Lyngdoh, Cabinet Minister Dharmendra Pradhan-na lekka sedoatenba SSA skigiparangni dormaharangko ta•rake on•china mol•molataha.
George B Lyngdoh-ni janapatani gitade, SSA skulo skigiparang July 18 tarikonin uamangni man•na nanggni dormahako on•china dabie, soroksamo wal sal asonge jingjengataniko dakenga. Indiba MDA sorkari uamangni dabianiko da•alona kingkingba knachakkujaenga. Meghalaya sorkariko rikenggipa dilgiparangni u•iatani gitade, MoE skulo skigiparangni dormahako ra•chipe dongenga iani a•selsa skigiparang dormaharangko man•ningjaenga ine janapataha. Indiba ian uamangni an•tangtangko jokatna tol•gipa kattarangsan ong•aia. Maini gimin MoE-ara Meghalaya a•dokni fund-rangko ra•chipe roenga? Uamang fund-rangko ra•chipe maiko man•pilskaenga ine janapatkuaha.
Meghalaya Trinamool Youth Congress-ni President, Richard Mrong Marak-ba West Garo Hills a•jao skigiparangni jingjengatenggipa biapona re•ange grongenba skigiparangni dormaharangko ta•rake on•china sorkario dabiangaha.
“Chinga da•alo SSA skigiparang baksa, uamangni dabianio chakrimpaaniko mesokna bakko ra•enga. Chinga Shillong-o ong•enggipa obostarangko knasona gita man•enga. Sorkariko rikenggipa an•chingni dilgiparang skigiparangni dabianiko knachakna nangchongmota” ine Richard Mrong Marak aganangaha.