Baghmara, July 21, 2022: Federation of Khasi Jaintia and Garo People (FKJGP) Nongalbibra Circle Siju-Rongara elekkani MLA Rakkam Sangma-na lekka sedoatenba Nengsing gittim-oni Jongsin gittim-ona Simsang chibimako kabatgipa hanging bridge-ko taridape on•china mol•molangaha.
FKJGP Nongalbibra Circle-ni janapani gitade, Nengsing gittimoni Jongsin gittimona ga•batgipa hanging bridge nosto ong•aha. Ia dollongko bang•a songrang jekai Dajugittim, Jangkal Awe, Nengbrek, Jongsingittim, A•kep, Darang Chima Dachit, Nengsrang aro Darang Boldak-ni manderang jakkalenga. Seroni Nengminja Secondary Skulo poraienggipa chadamberang salantian ia dollongko ga•batenga. Indake ia dollong salsa bate bate nosto ong•rikrikenga. Ia dollongni nosto ong•anganiko nike, songni manderang dollong griode neng•nikbegen ine dollongko rakatna wa•dingrangchi aro ramram tar budurangchi kae jakkalenga. Ia dollong dongjagenchimode, Simsang nalsao donggipa adita songni manderangna bang•a neng•nikani ong•gen aro manderangni ga•changbatmiting somoio tanggitik dollong chottome a•selrang ong•aniko champengsona gita ia dollongko ta•raken taridape on•na nangchongmota ine FKJGP dabiangaha.