TMC MDC-rangni ra•bagipa minggni motion-ko GHADC budget session-o ra•chakja
Tura, July 28, 2022: July 27-29-ona ong•atenggipa GHADC-ni 5-gipa Budget Session-o TMC, MDC-rangni ra•anggipa minggni “non-official” motion-ko GHADC-ni Executive Committee Bristibar salo ra•chakjaha.
Indake skanggipa “non-official” motion-ko Williamnagar elekkani MDC Alphonsus R. Marak aganangaha. Skanggipa motiono ua, Seperate Elektoral Roll-ni bidingo aganjanapangaha. Gnigipa motion-ko Dengnakpara elekkani MDC Sadhia Rani Sangma aro Kharkutta elekkani MDC Cherak W. Momin aganangskaha. Uamang sakgni B-Mahal a•arangni bidingo aganjanapangskaha.
Indake session-ni ja•mano kobor ra•timgiparangna aganprakengon, TMC MDC-rangni ra•anggipa motion-ni bidingo chanchirimna gita GHADC-ni Chairman Sengchim N.Sangma on•jaha. Indake uamangni ra•anggipa motion-ko batanggimin changoba GHADC ra•chakjaha. GHADC-ni nokdringo donggipa TMC MDC-rang vote-ko on•ahaon ia motion-ko chanchirimna gita gipin sak 14 MDC-rang ia motion-ko jegale vote-ko on•angskaaha. Indake namnikgijagiparang bang•batank a•selo ia motion-ko GHADC budget session-o jegaltokahani gimin warachakenggipa TMC MDC-rang session matchotgija, session nokdringoni ong•kate re•batokaha.
“Chinga bang•a changon NPP dolchi rikenggipa GHADC-ni Executive Committee-na B-Mahal-ni bidingo aganjanapaha, indiba uamang changsaba chingni agananirangko knachakja. Uamang an•tangni man•gnina B-Mahal-ni bidingo golpoaniko jegalenga. Sason ka•enggipa GHADC-ni gipin MDC-rangko bak nangatgija an•tangni miksonge dongenggipa kamko sriksrik ka•e matchotatna cholko ra•enga” ine Kharkutta-ni MDC Cherak W.Momin matnangaha.
“Chinga ia minggni Motion-ko court-ona ra•bataiaha, maina ia ge•gni motion-ko chingasan ong•ja, indiba a•dokni pilak A•chik jatrangan dabienga aro nangnikenga. Batanggimin eleksino bang•a NGO-rang gipin jatrangni GHADC eleksino bak ra•ani bidingo jegale jingjengatanirangko ong•atangaha. Chinga A•chik jatna miksonge ia ge•gni motion-ko ra•bataiahachim, indiba NPP dolchi rikenggipa Executive Committee, chingni ra•bagipa motion-ko jegaltaiaha” ine Williamnagar-ni MDC Alphonsus R.Marak agandapatakaha.
“Chinga ia motion-ko gittamgipa changna ra•baaha, indiba uamang chingni ra•bagipa motion-ko changni chang jegalskaha. Chief Eleksin Commission-ni ning•o donggijagipa local body eleksinkode, India sorkarini see rakkigipa 6-gipa schedule-o seegimin lekkarango pangchake gital niamrangko tarina man•a. 6-gipa schedule-ni skanggipa page, 6-gipa para, sum nombor 2-o janapani gitade, GHADC-o seokako man•gipa membor-rang eleksino sawa bak ra•na man•gen aro man•jawa, ua niamko tarina gita bil donga. Indiba dilgiparang da•alona kingkingba ia kamko ka•kujaenga” ine Alphonsush R Marak aganaha.
Ia session-o bakko ra•gipa TMC-ni MDC-ranga Dengnakpara elekka-ni MDC Sadhiarani Sangma, Williamnagar elekka-ni MDC Alphonsush R Marak, Rongrong elekka-ni MDC Rinaldo K. Sangma, Damas elekka-ni MDC Fardinand D Shira, Kharkutta elekka-ni MDC Cherak W. Momin, Betasing elekka-ni MDC Sanjay Koch, Samanda elekka-ni MDC Lahitson M Sangma, aro Balachanda elekka-ni MDC Agassi Marak ong•achim.