Tura, August 30, 2022: Mid-day meal-ko song•e on•timgiparang uamangni man•na nanggni dormaharangko somoi gita man•jae, “Chingna tangka paisarangko gamna man•jaode, mid-day meal scheme-ko bon•atsrangbo” ine duko ga•akenggipa saksa chirikwate aganaha.
SSA skulo skigiparang aro ASHA-o kam ka•enggiparangni ja•mano, Mid-day meal-ko song•e on•timgiparang, MDA sorkarini kamko jegale jingjengatanirangko ong•atangaha.
All Jaintia Hills Mid-day Meal Workers Association dolni dakdilanichi a•dokni bang•a mid-day meal-ko song•timgiparang Secretariat Office mikkango jingjengatanirangko ong•atangaha.
Uamang changni chang a•dokni Skotong Minister Conrad Sangma-na lekka sedoatenba, neng•nikanirangko parakataha, indiba Skotong Minister changsaba uamangni neng•nikaniko namatna ja•ku de•jaha. Unbaksana MDA sorkarini aganchakanirangko man•jaha ine parakataha.
Indake ong•engon, Meghalaya TMC ia obostani bidingo sing•sandianiko dakahaon bang•a obostarangko ma•siaha. Borobhuipara SSA UP Skulo June jaoni mid-day meal-rangko on•jaha, ian song•e channe on•chakram nok dongjani a•sel aro ringani chi dongjani a•sel ong•aha. Jal Jeevan Mission-ni gita ia skulna chi pipe-rangko sale on•ahachim, indiba skulona salbagipa chi pipe gita chi jokjaengani gimin uamang neng•nikako man•enga.
Moodymmai-o donggipa Deinthare Lower Primary SSA Skulo, poraienggipa bi•sarang mid-day meal-ko cha•na man•na gita am•bolrangko ra•bana nanga. Apsandaken ia skuloba poraienggipa bi•sarangna mid-day meal-rangko song•e on•na man•jaenga.
Uamangni parakatani gitade, ja prako mi bijak song•e on•timgipana hajar 1-ko on•enga, indiba ua dormaha salantio kam ka•na nangani hajirana bate komia ineba janapataha.
“Chingna ja prakni compensation-ko gong 100-oni 900-ona baridapatbo, unbaksana mi bijak songchakram babilsio LPG Cylinder-ko on•bo” ine dabiangaha.
Meghalaya a•dokni TMC President Charles Pyngrope, “MDA sorkariko chalaienggipa manderang, maiko chanchie aro maidake, indakpile manderangni man•na nanggni tangkana chrik a•boke grappako chakchike nie dongna man•a” ine sing•doangaha.