RB-oniko rim•anga man•gipa me•chikni pagipa Tura jail warden-ni kosako badi ka•a 

Tura, August 30, 2022: Rimpu Bagan (RB)-oniko rim•e ra•angako man•gipa me•chik saksani pagipa Meghalaya Human Rights Commission (MHRC)-o pangchake Tura jail warden me•chikni kosako badi ka•aha.

RB-oniko rim•anga man•gipa Silchi Nora G. Momin-ni pagipa Jonan Ch Sangma, uni demechikko custody-o donrikanina aro uko doke satte roaniko jegale, Tura jailni warden-ko badi ka•aha.

“Angni demechik Silchinora G Momin jekon Tura Women PS Case No 105 (7)22 u/s 3/4/5/6/7 Immoral Traffic (Prevention) Act 1956, IPC Sec 370(3)-o pangchake pattoko donengachim, uko rim•e ra•angani kanta 24-ni gisepo District Magistrate-na mesokejaha. Uko July 22 tariko Rimpu Bagan-oniko rim•e ra•angaha, indake uko pattoko donani ja•mansa August 24 tarik Robibar attamchipaksa, District Magistrate-na mesokeaha” ine Jonan Ch Sangma parakataha.

Pagipani parakatani gitade, uni demechik ku•sik name aganna man•jae kattarangko rongtale aro srange aganna man•ja aro iani a•sel Tura Jailni Warden uko satkapaha. “Angni demechik gipin bi•sarang gita ong•paja, ua disable ong•a aro sakkina uano 50% disability-ni Certificate-ba donga. July 22 tariko angni demechik, uni mikchatang jekon ua bilsi 10-na bate mikchaengahachim, un baksa Rimpu Bagan Edenbari-ona re•angaha. Angni demechik-ba Fundamental Rights gnang, 1949 bilsini Constitution of India-ni Article 21-o janapani gitade, darang mandekoba an•tangni skako dakna champengna man•jawa ine sea gnang. Article 22 (2)-o janapani gitade, pulisrang mande rim•genchimoba kanta 24-ni gisepon uamangko sepangbatgipa Magistrate-ona rimange mesokna nanga. Indiba angni demechik-ko uamang adita salrangna kingking rakkie donani ja•mansa Magistrate-ona rimangaha ine aganaha.

Trial-o dongenggipa mandeko pulisrang satkapna aro doke satte rona maming bil dongja, uni gimin anga MHRC-ni membor-rangko ia obostani bidingo sing•sandianiko dakchina mol•molna sika” ine parakataha.