Nongalbibra, Aug 30, 2022: South Garo Hills a•jani nangrimgimin Nongalbibra-ni NGO-rang GSU aro FKJGP, Nongalbibra Sub Divisional Assistant Manager (SDM) aro FEDCO Company-ni kosako badi ka•e, South Garo Hills a•jani Deputy Commissioner-na lekka sedoataha. Indiba da•alona kingkingba District Administration (DA), SDM aro FEDCO Company-ni bidingo maming sandianiko dakkujaengani gimin namnikgijaniko mesokna da•al August 30 tariko Nongalbibra MeECL office-ni mikkango asonge jingjengataniko a•bachengataha.
GSU Nongalbibra Regional Unit-ni President Sewa S.Marak-ni u•iatani gitade, Nongalbibra-oni Nengbrek song gita Darang Boldak-ona sringanggipa 11KV bilakbegipa bijoli silitting (wire) a•ona namen tang•onani gimin matburingrang aro manderangna namen kenbegni ong•engani gimin, tang•onne dongenggipa 11KV bijoli line-ko tarichina changni chang Nongalbibra-ni SDM-na koborko on•ahachim, indiba SDM aro FEDCO company knachakgija dongani a•sel, re•aggipa August 18 tariko Nengbrek songni me•chikma saksa Suritha N.Sangma buringchi e•sal akna re•ange ua bijoli silittingo nange janggitangko gimaataha.
Iani bidingo NGO-rang ning•tue sandianiko dakchina South Garo Hills a•jani District Administration-na lekka sedoatahachim, indiba da•alona kingkingba maming sandianiko dakkujaengani gimin jegale August 30-31 tarikona Nongalbibra MeECL Office mikkango asonge jingjengataniko dakanggen ine parakataha.
Uni gisepon maming agachakaniko ba sandianiko dakja ong•ode, MeECL office-ko picketing ka•anggen ineba parakataha.
Ia a•sel ong•aniara MeECL department-ni simsakja donani a•selsa ong•aha, unbaksana department-o kam ka•gipararang chu•ongjani a•selba ong•aha. uni gimin mikkangchi indakgipa a•selrang ong•taijachina FEDCO ta•rake kamko ka•na nanga aro uamangni simsakgija mandeni janggiko gimaatahani gimin, SDM aro FEDCO company-ni kosako raka ja•kurangko de•e, niam gita sasti on•na nanga ine NGO-rang Skotong Minister aro Power Minister-ko mol•molataha.
Unbaksana jakgittele sandiani report-ko power minister-na on•china aro Meghalaya sorkari baksa FEDCO Company-ni soi ka•gimin MoU-ko ra•galna nanga ineba NGO-rang dabiangaha.