Resubelpara, April 23, 2022: Meghalaya Trinamool Congress (TMC) block level tom•bimonganiko April 23 tarik Sonibar salo Bajengdoba Block-o ong•atangaha.
Ia tom•bimonganio dingtang dingtang block ba district-ni TMC dilgiparang, social organisation-ni dilgiparang aro Bajengdoba block-ni TMC dilgiparang dongpae bakko ra•angtokaha.
Ia tom•bimonganiko North Garo Hills-ni TMC District President Cherak W Momin dilangaha. Indake re•baenggipa 2023 bilsini Assembly Eleksin-o maikai mikkangchi tom•tome aro nambate doltangna kamrangko ka•angna man•gen, iarangni gimin jinma chanchirimangaha. Apsandake mikkangchi Meghalaya a•doko TMC-ko bilakbatatna Meghalaya a•dokni kona noksikrango songni manderangna TMC-ni nama miksonganiko agan talatanirangko on•angna gitaba chanchirimangaha.
North Garo Hills-ni District President Cherak W Momin, bang•bea Bajengdoba-ni manderang tom•anio dongpae bakko ra•angahani gimin mittele aganangaha. Indake tom•ani bon•chotao, “Anga gisik ka•tong gimikchi TMC dolna an•tangtangko on•kange chakpae kamrangko ka•enggipa manderangkoba mittelna sika. Unbaksana anga ka•donga mikkangchi TMC dolni nama miksonganiko nike bang•bata manderang bakrimanggen. TMC niksamsoa gnang Meghalaya a•dokni manderangna namroro silroroaniko aro tom•tomaniko ra•bana miksonge kamrangko ka•enga. Maina da•o sason ka•enggipa sorkarini ning•o a•dokni manderang bang•a neng•nikanirangko chagrongenga” ineba Cherak Momin agandapangaha.