Tura, April 23, 2022:West Garo Hills a•jani Gambegre C&RD block-ni ning•o donggipa Chenggapara songo Environmental Protection Awareness Program-ko Pringnam Sports and Cultural Club-ni gita Sukrobar salo ong•atangaha.
Ia Pringnam Sports and Cultural Club-ko dakdilenggipa ba jakrikra Bostone M.Sangma-ni parakatani gitade, ia program-ko ong•atani miksongara songni manderang aro chatro chatrirang mikkangchi maikai bol-wa•arang aro chiring chibisikrangko name ripingangna man•gen, bol wa•arang dongjaode, haida changsaode Oxygen-ko bree rang•sitna nangnaba donga ine Bostone Sangma mikkrakatangaha.
Ia program-o Sengkan Ch.Marak-ba dongpae, mikkangchi environment-ko name ripingangchina chatro chatrirangko didiangaha, maina bol wa•arang Carbondioxyde-ko rang•site mandena nangchongmotgipa Oxygen-ko wate galskaa. Uni gimin an•chingni samtangtango dongenggipa buring bolgrimrangko name ripingna nangchongmotenga ine agan ku•pattiangskaha.
Indake ia program-o chatro chatrirang sak 100-na baten bakko ra•angaha ine u•iataha.