Resubelpara, May 2, 2022: IIT Guwahati-o poraie pass ka•gipa aro unbaksana North Garo Hills a•jani District Youth Congress Committee (DYCC)-ni President Te Timjim K Momin, CUET porikkako a•doko bilsi gnina ba una bate dontongatchengchina sorkariko mol•molangaha.
“CUET porikkako sena sienggipa chadamberang bang•a neng•nikanirangko chagrongna nangenga. A•dok sorkari CUET porikkako dontongatchengna nanga. Jedakode re•baenggipa bilsirango porikkako sena sienggipa chadamberang namedake poraisona gita man•gen. Uasan ong•aigija gipin, gipin a•dokrang baksa nigrikatgenchimode NE a•dokrang gimikan ja•manchakbatenga. Anga saksa IIT-o poraie nike ma•sia, Central-ni poraigipa chatro chatrirangko warachakna namen neng•nikani ong•a. A•songni gipin a•dokrangna bate NE-ni a•dokrang ja•manchakbatenga, indake ong•enggon CUET porikkako Meghalaya a•doko ra•gataniara poraienggipa chatro chatrirangna a•bri totsako maldona nanga gita chacha ong•enga” ine Timjim Momin janapataha.
Poraienggipa chadamberang jemangan central-ni porikkako sena siengachim, uamang bilsi gni ba bilsi gittamna kingking an•tangtangko tarisamsoa. Indide a•dokni kona noksiko donggipa chadamberangara maikai central-ni porikkako sena gita man•gen. Uamangna Central porikkani bidingo maming mikrakataniko on•jagenchimode, skulrango computer-rangko jakkalna skijagenchimode, maikai uamangara porikkako sena gita chol ong•pagen. An•ching a•dokni skigiparang aro chadamberang ia porikkako sena gita tarisamsoaha? Ian da•alo an•ching gimikni sing•na nangani ong•enga. Meghalaya a•dokni Garo Hills a•jarango bang•a chadamberang Central-ni porikkako sea komia, uamang segenchimoba segiparangoni 10% rangni gitasan porikkako pass ka•aia. Indide sak hajalni hajal poraienggipa chatro chatrirangara ia competitive porikkako maikai sena gita man•gen. Beben CUET porikka manderangni janggi tanganio bang•a dingtanganiko ra•bagen aro nama mark-rangko man•genchimode, a•songni mingsinggipa University-rang, jekai Jawaharlal Nehru University, Banaras Hindu University, University of Hyderabad, University of Delhi, Jamia Millia Islama aro uandake bang•a University-rango admission ra•e poraina chol ong•gnokchim. Indiba Meghalaya a•dokna indakgipa porikkarangko tanggitik ra•gataniara sagalko jrobatna nanga gita ong•a. Meghalaya a•dokni 90% kolege-rang NEHU-o affiliate ka•a, indake ong•anichi bang•a chadamberang neng•nikanirangko man•a. Iani a•selo a•dok sorkari name chanchie CUET porikkako dontongatchengna nanga ineba ua agandapaha.