Williamnagar, May 2, 2022: Garoland State Movement Committee (GSMC) Nengkra Unit ni General Secretary Tengman Marak, Nengkra jolo Primary Heath Centre (PHC) ko songe on•a nangchongmota ine sorkariko molmolangaha.
Tengman Marak ni parakatani gitade, East Garo Hills a•jani ning•o donggipa songrangoni Nengkra songan galchipako manbatsranggipa ong•a. Nengkra songo PHC ko songe on•a nangchongmota ine bang•a NGO dolrang 2013 bilsioni dabibaenga. Uamang gitcham skotong Minister Dr Mukul Sangma aro gipin gipin MLA aro MDC rangna PHC ko nangnikani bidingo aganjanape memorandum ko on•ahachim.Indiba da•alona kingkingba sorkari uamangni nangnikaniko knachakja aro bimang pil•ateba on•ja ine u•iataha.
Nengkra o PHC ko sorkari chusokate on•genchimode East Garo hills a•jani headquarter Williamnagar Town oni chelbegipa songrang jekai Chiokgre, Songmagre, Dawagre aro Chimagre, Chimadachit uasan ong•aigija South Garo hills District a•jani ning•o ga•akgipa Suduggre aro Garegittim indakgipa songrango songdongengipa manderangni sanna banna re•a doanio neng•nikanirangko sorkari tarake namatna ja•kurangko de•angna nanga ine didiangaha.