Manderangni mikrono nikgijagipa kamrangko ka•e jinmani tangkako oke cha•a: Bernard
Tura, May 2, 2022: Skotong Minister Conrad Sangma aro Tura-ni MP Agatha Sangma-ko uamangni manderangan aro contractor-rangan cha•bokenga ine Tura-ni MDC aro BJP dilgipa Bernard N. Marak parakataha.
“NPP dolni manderang aro contractor-rang MPLAD aro SUWP fund-ni dal•a dal•a project-rangko jako ra•e, matchotaha ine tol•e gipinni kamko ja•chipchang ra•e mesokenba tangka oke cha•enga. Uamang jinmani ba public-ni tangkarangko an•tangni namgnina jakkalsretenga, indakgipa kamrangko RTI ka•e ma•sina gita man•aha. Tura Municipal Board-o RTI ka•giparangko niate nion, uamangni tol•e tangka oke cha•anirangko nikna gita man•aha. SUWP (2018-19)-ni project-ko matchotman•aha ine kamrangko ka•gija tangka oke cha•aha, unbaksana MPLAD ( 2018-19)-ni ning•o ga•akgipa project-koba uamang kam ka•gija songni manderangko cha•bokaha. Ia project-rangko matchotaha ine uamang tol•e jinmako cha•bokaha. Ia project-ni bimangrang a•gilsako aro jinmani mikrono dongja. Indakgipa bang•a project-rangoni mingsa project, Kongbe A•ding-ni gopramo donga, NPP dolna kam ka•gipa saksa MPLAD (2017-18) bilsio lak 3-ni project-ko man•aha. Ua Ranggira gittimni gopram jekon Kongbe A•ding Gopram ine ma•sitokbata, ia gopramo manderangna neng•takani nok ba waiting shed-ko rikna gita project-ko man•aha. RTI ka•anio ia project-ko matchotaha ine mesoke tangkarangko oke cha•manaha, indiba jinmani mikrono aro a•gilsako ia project-ko rikgipa nok dongja. Ua SUWP (2018-19) bilsioba Kongbe A•ding gopramo RCC shed-ko rikna ine lakh 1-ni project-ko man•dapaha, indiba ia kamkoba ua ka•gija tangkarangko oke cha•taiaha. Kongbe A•ding gopramo neng•takram nokko gittimni manderangsa tangka gile rikgipa noksa ong•a” ine Bernard Marak matnangaha.
Kongbe A•ding aro Ranggira gittim apsan gopramkon jakkala, indake ua MPLAD aro SUWP-ni project ge•gniko gittim ge•gnini bimingo man•aha. Indiba sing•sandie nion, ia project-ni kamko ka•jaha, Kongbe A•ding aro Ranggira gittimni manderangsa tangka gile gopramo nokko rikaha.Ua rikgimin nokko ja•chipchang ra•e mesoke tangkarangko oke cha•aha. Uasan ong•aigija Kongbe A•ding, Municipality-ni ning•o ga•akja, indiba jinmani nikanio u•iatgija Municipality ua project-ko on•aha aro gipin official-rangba re•e doe nigija uni kamko matchotaha ine agangipa kattarangko bebe ra•aha. Project-ni kamko ka•gipa mandeko iano mingatjaha, jedakode CM aro MP an•tangan uamangni Party Worker-ni ong•gija kamko ka•e jinmani tangkako oke cha•gipa mandeko sandie bichal ka•china, indiba ua mandeni kosako maming ja•kuko de•ja ong•ode, chinga niam gita ua mandeni kosako ja•ku de•angskagen ineba Marak parakataha.
Indake jinmani tangkarangko cha•minokgipa manderangni bimingrangko aro uamangni man•gipa scheme aro project-rangni bidingo u•ina gita RTI-ko Tura Municipal Board-o ka•angdapaha. SGH-rang jean bang•a scheme-rang jekai NULM aro centre-ni scheme-rangko man•ahachim, uamangni kamrangkoba sing•sandie nianggen ineba Bernard Marak parakataha.