Tura, May 4, 2022: West Garo Hills a•jani ning•o donggipa Moulakandi songni saksa head mistri kam ka•gipa, Aminul Islam re•anggipa April 30 tarik Sonibar saloni gimaenga ine koborko man•soaha.Ua Tikrikilla-ni a•bri jolo donggipa Amonggre songo adita manderangni nokko rikengachim. Ua mande Sonibar saloni da•alona kingkingba nokona sokbapilkujaenga aro uni mobile phone-ba switch off ong•e, maming koborko ra•na man•kujaenga ine u•iataha.
Ua indita salona kingking nokona sokbagija gimaengani gimin, nokdangni manderang May 3 tariko “Missing Information”-ko Tikrikilla aro Phulbari Pulis Station ge•gnio seachi u•iataha.
Nokdangni manderangni missing report-o janapatani gitade, Aminul Islam saksa Khairul Islam-ni ning•o head mistri kamko ka•engachim, ua gipin kam ka•giparangna Sonibar salo tangka on•na gita Amonggre songona re•angaha aro ua salonin nokona re•bapiljaha ine janapaha.
Ua mandeko saoba banoba nika ong•ode, Association-ni dilgiparangna u•iatpachina mol•molataha.
Unbaksana Tikrikilla jolni A•king ge•antini Nokma, songantini Gaonbura, Soldar, Laskar, Mondol aro VDP membor-rang an•tangtangni gittimoniko am•sandie dakchakaniko on•atpachina Tikrikilla-ni Association of Nokma
& Gaonbura-ni Convenor mol•molataha.