GH-ni MG-o kal•susana re•anggiparang namgipa biapko on•anina CM-ko mittelata

Tura, May 3, 2022: Meghalaya Games ba kal•susaanirango bakko ra•na re•anggipa Garo Hills-ni chadamberang tuna dongna mikka selgipa, paikana re•na mitchi mitchi sera bera galchipe dongipa aro au-miksuchakna biap donggijagipa nokko donsoani gimin, kal•susana re•anggipa chadamberang suk ong•jae photorang aro vedio-rang ka•e social media-rango gipataniko Skotong Minister Conrad Sangma niksoe suk ong•gija, ua an•tangan biapko nina aro manderangko grongna Delhichini sokbaa bikan Jawaharlal Stadium ona waljatchio re•angaha. Skotong Minister chadamberangni dongchakenggipa biaprangko nike duk ong•aha aro bikan dongchakani biaprangko sandiatgen ine ku•rachakangaha. Ua organizer-rangko sokbagiparangna nama biaprangko tuna bamna tarisojani bidingo suk ong•jae biaprangko man•e on•ja ong•ode Organizer-rangko noktangchi nokchakna aganaha ong•jaode CM an•tangan CM Bangalowchi rimange nokchaksranggen ine gisiko duk man•e uno donge nirokenggipa manderangna aganprakaha.

Indaken Skotong Minister an•tangni ku•rachaka gitan salgipino dingtang biaprangko ta•rake sandiatenba dongtogipa room-rangko Garo Hills-oni re•anggipa chadamberangna on•aha.

“Beben chinga adita somoirangna turam biap aro paikana dongjae, neng•nikaniko man•aha. Indiba Skotong Minister bikan kobor man•e, walni 12 bajio re•bae, chingna ka•sae namgipa dongchak tuchakani biaprangko on•aha. Da•o chingna nambatgipa hotel-kon on•aha. Uni gimin chinga gimikan Skotong Minister-ni namgipa kamna kusi ong•a aro uko namen mittelna kusi ong•a” ine kal•susana re•anggipa chadamberang Skotong Minister-na mittelpilskani kattarangko parakataha.

Meghalaya Games-ko bilsi 16-ni ja•mano ong•atpiltaina man•ani gimin CM kusi ong•aniko parakaha. Ia 4-gipa Meghalaya Games-o 2,600 manderang kal•suaanio bakko ra•anggen aro ge 19 category ba ge 19 susaani rokomrang donggen. Meghalaya Games-ko May jani 3 tarik First Ground Polo-o oprake a•bachengataha aro gimik susaani ia jani 7 tariko machotgen.