Tura, June 9, 2022: Tura Govt Kolege-o poraienggipa chatro chatrirangna BA 1st Semester-ni admission form-rang aro prospectus-ko June 10 tarik Sukrobar saloni on•gnok ine Tura Govt Kolege-ni Principal u•iataha.
Admission form aro prospectus-na tangka gong 150-ko game ra•ena man•gen. Admission form-rangko ge•gni dake online aro offline mode-na on•enga ineba u•iataha.
Uni gimin, je chatro chatrirangan online admission ka•na sikengachim, admission-na gamna nanggipa tangkako form submit ka•ani somoio gamna nanggen. Online admission ka•giparang admission form aro prospectus-ko kolege website tgctura.edu.in oniko download ka•na man•gen.
Admission form-rangko submit ka•ani bon•kamgipa tarik June 17 tariko ong•gen, uni gimin 17 tariko ba una skang form-rangko submit ka•na nanggen ine u•iataha.
Candidate-rangko June 29 tarik pring 10:30 bajio Interview Board-ko ra•gen. Uni gimin candidate-rang nangchongmotgipa Original document-rangko ra•bite June 29 tarikni pring 10:30 bajina skang kolege-ona sokbana nanggen ine parakataha.
Je candidate-rangan an•tangtangni form-rangko somoi gita submit ka•na man•ja aro jemangan Interview Board-na skang sokbaja, je a•selrangko parakgenchimoba uamangni admission-na maming ka•sachakani dongjawa ine parakataha.