Ampati, June 9, 2022: Meghalaya a•dokni gitcham Skotong Minister aro Meghalaya AITC-ni dilgipa Dr.Mukul Sangma, District TMC-ni Convenor Richard M.Marak aro gipin Meghalaya a•dokni AITC dilgiparang baksa Bristibar salo South West Garo Hills a•jao chi bana re•e, nosto ong•gipa biaprangona re•ange nieaha.
Bristibar pringchibara mikka jimbee waanichi, South West Garo Hills a•jani Betasing blockni ning•o donggipa songrang chi bana re•e bang•a nok jamrang, a•palo ge•gipa mirang, bagan barirang nosto ong•atako man•aha.
Indake ong•engon, Betasing blockni ning•o donggipa Samatigaon songo nokdang ge•sako a•a rudape bilsignini bi•sa saksa an•tangni gamchatgipa janggiko gimaataha. Ua nokdangonaba Dr Mukul Sangma re•ange, nokdangni manderangko grongeaha aro kalimpaaniko parakataha.
Iandakgipa natural calamity ba ong•telaigipa obostarangko basako chagronggen, darangba agansona man•ja. Uni gimin disaster management-ni gita mock drillrangko dake manderangna mikkrakataniko aro simsake donganiko on•aha, iano pangchake pangnan an•tangtangko naljokatna simsake dongna nanga ine Dr Sangma songni manderangna agan ku•patiangaha.
Chi bana re•anichi nok jam nosto ong•e duko ga•akenggipa manderangna dakchakaniko on•china South West Garo Hills-ni Additional Deputy Commissioner in-charge baksa agangrikaha. Da•o district administration badia songrango nok jamrang nosto ong•aha, uarangko sandiengaha ineba Dr Sangma agandapangaha.