Boldamgre-ni Nokma GHADC-ni CEM-na lekka sedoata

0

Tura, June 9, 2022: Boldamgre A•king Mouza No.lll 27 (4) songni Nokma an•tang A•kingni a•arangko srik srik palsruke cha•anina GHADC-ni CEM-na Bristibar salo lekka sedoataha.

“Boldamgre songo donggipa Sko Mahari, Challang Marak-ko songni Nokmana jinma kusi ong•e ra•chakenba songaha. Indake June 5 tariko GHADC-o Nokmana biming segataha (Register) ka•aha. Boldamgre Songni manderang jinma apsan tom•e a•ako darang rorinaba pale cha•na man•jawa ine tik ka•aha. Indiba songni Batjing Marak, Nanda Sangma, Metel Sangma aro Meena Sangma maharini dongimin niamko pe•gale gipin jatna a•arangko palalaha. Songni Nokma aro manderang uamangna ka•sachake A•kingni a•arangko game ge•e cha•china on•aha aro darang rorinaba pale cha•na man•jawa ine tik ka•aha, indiba uamangni dongimin niamko ja•rikjaha. Uamang Assam a•dokni gipin jat Basa-ni depante Perajul aro Mojit-ni depante Kobidul-na sriksrik a•arangko palsrukaha ine u•iataha. Uamang Sko Maharini dongimin niamrangko pe•e galaha” ine Nokma parakataha.

Palsruke cha•gipa manderangni a•sel Boldamgre songni bang•a A•chikrang, songdongenggipa gipin jat baksa bobil dinggrikatna jotton ka•enga. Uni gimin GHADC-ni gita kosako janapatgimin obostani bidingo palsruke cha•gipa aro palako bregipa manderangni kosako badi ka•na gita nanga ine Nokma janapataha.

Leave A Reply

Your email address will not be published.