SWGH-o niamgri challaienggipa sawmill-rangko dontongatchina GSMC dabia  

Ampati, Aug 13, 2022: South West Garo Hills a•jani ning•o donggipa Mahendraganj aro Bolonggre Kalaichor jolrango Niam Gri bol ratani karkana (Showmill)-rangko chalaienga ine GSMC Zikzak Unit-ni General Secretary Dichon Ch Marak, Forest Department-ni gita niamo pangchake sawmill-ko chipatchina didiataha.

Niam gri sawmill-rangko challaienba Garo Hills-ni bolrangko Assam-china pale cha•enga. Minggipin Assam a•dokona Kalaichor, Boldamgre, Bolonggre rama gita bolrangko salruraenga.

“Chinga GSMC Zikzak Unit, ia niam gri challaienggipa sawmill-rangko DFO aro Officer-rang nirok sandina nanga. A•chik A•songni nitogipa buring bolgrimni bolrangko pale cha•genchimode neng•nikaniko man•chongmotgen. A•gilsako ding•anirang batroroengani gimin A•gilsak gimikon World Environment Day-ko manie bol wa•arangko ge•dapenga. Uni gisepon, niam gri sawmill-rangko challaie Garo Hills-ni bol wa•arangko cha•ue bolrangko bon•atskaenga. Ian A•chik a•songna dal•bea gimaani ong•enga. Chingni ma•sia gitade, walosa bolrangko sruk sruk Assam a•dokona salruraenga” ine Dichin Marak u•iataha.

Mahendraganj, Kalaichor aro Dolgapara jolrango niam gri sawmill-rangko challaienga. Uni gimin Forest Department niam gri challaiengipa sawmill-rangko chu•gimik dontongatna nanga ine GSMC Zikzak Unit dabiangaha.