Ampati, Aug 13, 2022: South West Garo Hills-ni Skotong songjinma ba district headquarter, Ampati Ghasura, State Highway (SH)-12 ramao Tata Truk bolsa ML-08D 0715 mande saksako saldape siataha ine kobor man•aha.
AHAM, South Western Zone-ni General Secretary Wester G.Sangma-ni u•iatani gitade, truk gari salpaka man•ne sianggipa Pa Laiking N Sangma ong•achim. Ua Ampati Mondolini Dokdori aro Chokkidar-ni kamko ka•engachim. Ua
Mondolini nanga lekkarangko Bolsalgre songona ra•ange noktangona motor bikeo re•bapilmitting somoio rang•gitik truk gari salpake katangani a•sel ua an•tangni ka•sabegipa jik dedrangko, mahari ma•drangko aro ripengskarangko wate jringjrotna neng•takram biapona re•angaha.
Pa Laiking Sangma-ko pulisrang bakan Ampati Civil Hospital-o sanna gita ra•angachim, indiba bilongbee saknaako man•ahani gimin hospital-on janggi galaha ine u•iataha.
Ia a•sel Sukrobar attamni 6:15 bajimango ong•aha. Dos dakgipa truk driver, Ampati Civil Hospital sepango gariko gale katangaha. Ia a•selni bidingo Pulisrang sandianiko dakenga indiba dos dakgipa truk driver-ko rim•na man•kuja. Indake ong•genchimoba, kakket bichalko on•china nokdangni manderang Ampati Stationo badi (FIR) ka•aha. Indakgipa a•selrang batanggimin salrangonin simsakgija skatang truk garirangko salanichi bang•a manderangni janggirangko gimaataha ineba u•iataha.