Tura, March 18, 2022: Ministry of Women and Child Development (MWCD), District Administration, Health and Family Welfare aro gipin department-rang baksa bakrime, “Swastha Balak Balika Sparsha” an•seng baljokgipa bi•sarangna susagrikaniko, Plan India-ni gita ong•atenga.
Ian an•seng baljokgipa bi•sarangna manianiko dakna miksongani ong•a. Iako India a•song gimikon March 21-oni 27 tarikona susagrikaniko ong•atenga aro iako chu•sokatna miksonganio bilsi 0 bilsioni 6-ona ong•gipa bi•sarangko jrimani aro changroaniko toan baksana namgipa cha•a ringani aro an•seng baljokani bidingo talate manianggen ine parakataha.
Bang•bata Meghalaya a•dokoni mongsongbate Garo Hills a•jao bilsi 0-6-ona ong•giparang cha•ani chu•ongjae, ram•sisi ram•dengdeng dakgiparang jriani chu•ongja.
West Garo Hills-o NFHS-5-ni report gita 39.5% bilsi bongana komigipa bi•sarang bilsini kri changrogijagipa ong•a. Uarangoni 14.9% bi•sarangni changroani kri jriani komigiparang ong•a. 26.3% rangara jriani komia.
Uni gimin anga bak man•pagiparangko mongsongbate ma•a paarang bi•sarangko nirokgiparangko NGO-rangko gittimni development committee-rangko BO-rangko, SHG-rangko bakrimpachina aro jrianiko sepangbatgipa hospital ba Sub Centre ba Anganwadi centre-rangona re•ange mol•molatenga.
Unbaksana ma•a paarang Poshan Tracker Apps-ko play store-oniko download ka•na man•gen aro Apps-o register ka•chenge an•tangtangni bi•sarangko tona man•gen aro uko Poshan Tracker-o upload ba gatatna man•gen.
Uni ja•mano Digital Certificate-ko an•seng baljokgipa bi•sa man•gen. Indake Intensified Mission Indradanush-ko ong•atanio chu•sokatna gita Mission Indradanush 4.0 daksamsoaniko ong•atengaha.
Uni gimin ma•a paaramg bi•sako nirokgiparangko an•tangtangni bi•sarangna biji su•samsoaniko bilsi 2-na komigiparang jerangan biji su•samsoaniko man•na nanggiparang, matchotkugijagiparang, sorkari health centre ASHA, AWW aro ANM-rangko kobor man•na gita grongbo.
Hai an•ching sakantian ia miksonganiko chu•sokatna bakrimpana, jedakode an•chingni bi•sarang janggi tangani gadangko namdapatna aro an•seng baljokgipa ong•atna ja•ku de•angna ine mol•molangaha.