Tura, March 18, 2022: Tura elekka-ni MDC Bernard N Marak, GHADC-ni Chief Executive Membor (CEM) Albiniush R. Marak-na lekka sedoatenba 15-gipa Pay Commission-ni gita Tura elekka-na chamatgipa tangkarang gipin elekkanarangna bate namen komiani gimin nipiltaichina mol•molataha.
“Anga March jani 15 tariko 15-gipa Finance Commission (FC)-ni lekka seatako man•soaha. Angna seatgipa chittio janapatani gitade, uamang angko lakh 10-ni proposal scheme-ko tarichina ge•etaha, jedakode uamang 2021-2022 bilsina angni tariatgipa proposal scheme-ko ma•mong sorkarichina sokatna man•gen. 15-gipa Finance Commission-ni ning•o sualenggipa tangkarangko nike anga aiao inmanaha aro angni sing•anirangna aganchakaniko nangnikaha. NPP dolni MDC-rang lak 95 tangkarangko man•aha, indiba anga lak 10 mangmangkosan manaia. Ian ong•na kragijani aro ra•chakna man•gijani ong•chongmota. Angni elekkao sak hajal 60 vote pu•onna mangiparang gnang aro uamangoni bang•bata manderangan BJP-n su•dape angko cheataha. GHADC-ni dilgiparang indake tangkarangko sualaniara 15-gipa Finance Commission-ni tarie dongimin niam, grant-rangko 90%-de mande bang•ani kri aro 10% de a•ani kri on•gen ine see jote rakkigimin niamko pe•a gita ong•a. Re•anggipa bilsio GHADC-ni dilgiparang Tura elekka-na chamatgipa tangkarang jean kror 1 ong•achim, ua tangkarangko council-ni quarter-rangko taridapna aro ramarangko repidapna jakkalaha. Uamangni indake gipinna sokatgipa tangkarangko chau•e kamko ka•anira Tura jillani pilak voter-rangkk cha•minoka gita ong•a, indiba uamangni indakgipa kamrangchi NPP dolni Contractor-rang namgniko man•skaha” ine Bernard Marak janapataha.
“Anga GHADC-ni dilgiparangko mol•molna sika, na•simang BJP dolko aro Tura-ni voter-rang jemangan BJP-na pu•onahachim, uamangko mikchepe ra•jachina aro 15-gipa Finance Commission-ni sokatgipa tangkarangko doltangna nigija pilaknan kraa gita on•na nanga” ineba Bernard Marak didiangaha.