Cement-ni kamko ka•gipa mistrirang sorkarini on•gimin damna bate ra•enga:NAS

Williamnagar, March 18, 2022: Garo Hills-ona gipin biaponi re•bae kamrangko ka•engachim, uamang nangana bate damrangko ra•engani gimin bang•a manderang badi ka•aniko man•ne, Niksamso A•chik Society (NAS) Garo Community Organisation, sing•sandianiko dakangaha.
NAS-nj parakatani gitade, gipin jatrang Garo Hills-o jemangan cement-ni kamrangko ka•engachim, salo 700 ba 800 hajirako ra•e A•chik jatna neng•nikaniko on•enga• Gipin biaponi re•bae kam ka•giparang, Labour Department-ni on•gimin rate-ara skilled labour-na 457 aro highly skilled labour-505-san ong•a, indiba ia damna bate hajirako ra•enga.
“Chinga indake skatang sorkarini on•gimin rate-na bate nok rikgipa mistri-rang ra•engani gimin Williamnagar Urban jolrango kam ka•enggipa mistri-rangko okame uamang sakantikon niamko ja•rike damrangko ra•china didiangaha. Unbaksana sakanti songni nokni ma•a paarang u•igijagipa a•gital manderangko kam ka•atna nangja” ine NAS-ni President Tengrak Marak mol•molataha.
Tengrak Marak-ni mol•molata gitade, u•igijagipa manderangko kamo rakkie kam ka•atanichi, uamang kam ka•na skang tangka ra•chenga dakenba kamko ka•gija togie katani gimin, NAS sakantinan mikkrakaniko on•angaha.
Indake ong•genchimoba, mikkangchi sakantian a•gital rorirangna simsake darangba togia cha•bokako man•jana gita mikkrakatangaha. Uandakgipa a•gital gipin jatrang A•chik a•songo kam ka•na re•baa dake saniba noa-namchiko ba demechikko seke ba rime katna cholko ra•enga aro kragija kamrangko ka•e, A•chik jatna kratcha•aniko ra•baenga.
Uni gimin a•gital gipin jatrang A•chik a•songo kam ka•na re•bagiparangko nokchakjachina aro maming sakki grigipa rorirangna kamrangko on•jachina Williamnagar jolo songdongenggipa manderangko NAS mol•molataha.