Tura, January 13, 2022: Re•baenggipa eleksin-ko niksamsoe SVEEP Core Committee-ni membor-rang tom•aniko ong•ate, Person with Disabilities (PwDs)-rangna SVEEP-ni bidingo talataniko on•an baksa dakna nanggni kamrangko agan skie on•angaha. Ia tom•aniko Bristibar salo Tura-ni DRDA Conference Hall-o ong•atangaha.
Tom•anio aganprakengon, DRDA Project Director Dolrich Berin G Momin, “Meghalaya a•dokni Chief Electoral Officer, re•baenggipa Meghalaya Legislative Assembly eleksino voter-rang nambate dakchina aro pu•onani somoio maming neng•nikaniko man•jana gita Eleksin Commission, iarang gimikko man•gope Mission 300-o pangchake kamko ka•anggen” ine u•iataha.
Person with Disabilities (PwDs)-rangna tom•anio aganprakengon, ADC Eleksin, Rojalinda D Shira, “A•jao donggipa PwD-rangko ma•sina gita chinga Social Welfare Department-ni dakchakaniko nanggen. SVEEP Core Committee-ni membor-rang a•jao Voter Awareness ba mikrakatani program-ko ong•atna ta•raken, ja•ku de•na nanga” ine parakangaha.
Mission 300 program-ko Assembly Constituency ge•prakni dam 5 Polling Station-rango jerangan 2018 bilsini LA komiachim, uarango ong•atanggen. Re•baenggipa 2023 bilsini General Eleksino darangkoba watchakggija pilak manderangan re•bae vote-rangko on•epachina miksonge bikotaha. Batanggipa 2018 eleksino Hawakhana, Lower Babupara aro Chandmary Polling Station-ni voting percentage 34.37, 56.63, aro 59.36 san ong•e namen komiaha. PwDs Candidate, jean 40% disable ong•a, bilsi 80 batgiparang Covid sabisiko man•gipa manderang, Form 12 D-ni gita Postal Ballot Facility-ko jakkale Vote ka•na man•gen, ineba Rojalinda Shira u•iataha.