Williamnagar, Jan 13, 2023: South Garo Hills-oni East Garo Gills nangdimgipa sorok
Nongalbibra Darangboldak PMGSY rama gitalko taria matchotgija oprake on•na am•aniko Niksamso Garo Community Organisation (NGCO) jegalataha.
NGCO-ni u•iatani gitade, Darangboldak PMGSY ramako taria matchotgija oprake on•na man•jawa ine parakataha.
“Iandakgipa a•dok sorkarini kamko chinga NGCO raken jegalsona sika. Rama taria namgijako chinga nikaha. Chinga ua ramako re•ange nieaha, ua rama ta•raken nosto ong•aigen aro Simsang Chibimako dollong kabatgipa a•samo mangrakgipa pakmarangko tarijaha. Indakgipa kamko nikengoba Department-ni Officer-rang simsakja aro matchotgija kamko oprake ba on•na am•aniko chingna nangjawa” ine NGCO-ni President Tengrak Marak jegalataha.
Rama taria matchotgijako noksa de•e mesokatenga. A•songko namroro silroroatna ra•bagipa kamrangko cha•boke bon•atanichi Garo Hills-ni bang•a biaprangon kam matchotgija tangka paisarangko jakkalani a•sel Garo Hills-o namroro silroroanirang gimaenga. Bang•bata changon, company-rangna kam on•ani a•sel kam matchotjaenga. Company-rang kam ka•na skangan tangka paisarangko skatang jakkalna man•ani gimin, kamrangko matchotgija aro namgija ka•enga ine NGCO suk ong•gijaniko parakataha.
Indakgipa kamrangko Garo Hills gimikon department-rang simsakja ine NGCO matnangataha.