State Reservation Policy-ko dingtangatna ra•gatgipa resolution-ko House-o jechaka

Shillong, March 15, 2022: North Shillong-ni MLA Adelbert Nongrum-ni Monggolbar salo Budget Session-ona ra•gatbagipa Resolution-ko House-o jegalangtokaha.
Adelbert Nongrum, State Reservation Policy-ko gital dake taritaipilna nanggen ine aganenba ia resolution-ko budget session-ona ra•gatangha.
Ia resolution-ni bidingo Skotong Minister Conrad Sangma aganengon, ia resolution-ni bidingo name dake chanchie, darangkoba gisik sa•dikatgija namgipa raiko on•na nanggen. Anga MLA Adelbert Nongrum-ko ia resolution-ko ra•pilchina mol•molangaha.
“Anga ia resolution-ko jat ska jat bobil dakgrikna ra•baja, indiba sorkari angni minggittam sing•anirangna aganchakna man•na nanggen. Sorkari-ara Govt Job Reservation-ko maina Census ka•e u•ie ma•sigimin Garo, Khasi aro Jaintia-ni Demographic Ratio-ko jakkalja? Maina a•palchini a•dokona re•baenggipa manderangara state government job-ko Garo Category-o reservation-ko man•enga? Maina Reservation Policy-ming Academic Policy-ara apsan ong•a” ine ua sing•doangenba uni ra•gatgimin resolution-ko ra•pilna jechakaha.
Conrad Sangma Opposition-ni dilgipa Dr Mukul Sangma-ni ku•pattia gita indakgipa kamrangni bidingo an•ching saksande chanchina man•jawa, indiba iano dongenggipa membor sakantini rai-koba nanggen ine uni agananiko ra•chaka ine jinmana aganaha.
Adelbert Nongrum an•tangni resolution-ko ra•pilna gong•jani a•sel session-o donggipa pilak MLA rangni rai-ko ma•sina vote ka•angaha.Unon bang•bata MLA-rang ia resolution-ko jegaltokaha. Indake House-o uni State Reservation Policy-ko gital dake taripiltaina miksonge ra•gatgiminko ra•chakna jechakaha.