Shillong, August 10, 2022: Shillong songjinmao donggipa St.Mary’s Kolege-ni bilsi 19 ong•gipa chatri saksa gimaenga ine Pulisrang u•iataha.
Laitjem Mawphlang gittimni metra saksa Nizagiri Syiemlieh jean St. Mary’s Kolege-o poraiengachim, ua August 6 tarikoni campus-oni gimaenga ine koborna parakataha.
Koborko man•soani gitade, ia obostani bidingo gimaenggipa me•chikni ma•gipa Laitumkrah PS-o gimaani report-ko on•neaha.
Pulisrang gimaenggipa me•chikko sandichina u•iatanirangko on•ataha. Indake je mandean gimaenggipa me•chikni bidingo koborko man•ode ba nikode Pulis Control Room (0364-22222214) Laitumkrah PS Incharge (0364-223069), ong•jaode SP Office Crime Branch (8837282114)-ona call ka•e u•iatchina mol•molataha.
Nazigiri gimaani salo tangsim aro rimit rongni cholako ganachim. Uni changroa 5 ft ong•a, uni mikkang dawila aro ku•dipeo moli donga ineba pulisrang u•iataha.