Tura, March 19, 2022: All Garo Hills SSA School Teachers’ Association Central Body (AGHSSASTA-CB), SSA skigiparangni man•kugijagipa ja 5-ni dormaharangko on•kujaengani gimin skigiparang kamtangtangko ka•angkujawa ine parakataha.
AGHSSASTA-CB-ni Publicity Secretary Bunbunbirth R.Marak-ni parakata gitade, SSA skigiparang salanti class ra•anirangko aro medical-ni kamrang, eleksin-ni kamrang, diatrict block level ba CRC level-ni kamrangko March 14 tarikoni dontongata chu•gimik antisa gapaha, indiba da•alona kingkingba sorkarioni maming aganchaka dongkuja aro ja 5-ni dormaharangko on•na ku•rakkuja ine parakataha.
“Chinga changni chang memorandum-rangko aro mol•molani lekkarangko education minister aro skotong minister-na seate chingni dormaharangko chu•gimik on•pachina didiatahachim. Uni gisepon mija re•anggipa budget session-o dingtang dingtang MLA-rangba SSA skigiparangni neng•nikanina ka•sachake skigiparanhni dormaharangko on•china didiangaha, indiba sorkari maming aganchakjaha. Maina a•dok sorkariara chingni dormaharangko bilsi bon•piloba on•na man•ja aro 2021-2022 bilsini financial year bon•ahaoba PAB-ko on•na man•ja. Chinga a•dokko sason ka•enggipa aro Conrad Sangma-ni dilenggipa MDA sorkario ka•dongna man•jaha. Ua nagok ong•ani a•selsa skigiparangni bi•aniko knachakja, uni gimin jena kingking chingni man•gnirangko chu•gimik on•kuja dipetna SSA skigiparang kamtangtangko ka•gija dontongangkugen” ine association-ni Secretary B Ch.Marak parakataha.