Tura, March 20, 2022: Meghalaya a•dokni Governor Satyapal Malik, GHADC-ni CEM Albinush R.Marak-ni ning•o gital seoka man•gipa Executive Committee-rang district council-ni dingtang dingtang department-rangon Sombar dipet jako ra•e kamrangko a•bachengatchina parakataha.
GHADC-ni CEM Albinush R.Marak-ni ning•o donggipa sak 10 EC-ranga Deputy CEM Nikman Ch.Marak-ko man•chape, warachakgipa Trinamool Congress dolni MDC Stivie M.Marak aro UDP MDC Ashahel D.Shira ong•achim.
Unbaksana Skotong Minister Conrad Sangma-ni sakgni boningtang aro jongsari Grahambell A.Sangma aro Anseng A.Sangma-ko man•chape gital EC-na biming mingaha.Uarang baksana sakgni EC-o biming donggipa Independent MDC-ranga Arbinstone B Marak aro Nathwalal S Marak.
Indake ong•engon, NPP-ni EC-o biming donggipa MDC-ranga Henen R Sangma, Linekar K Sangma, Sengbath R Marak aro sakgni Skotong Minister-ni boningtang aro jongsariko biming man•chapaha.
Indake GHADC-ni CEM gital EC-rangna Sombar salo portfolio-rangko suale on•anggen ineba parakataha.