Tura, March 19, 2022: Mijal March 18 tarik Sukrobar salo ge•sa songbado saksa Probash D. Sangma jean an•tangko GSU, Phulbari Regional Unit-ni Chief Eleksin Commissioner (CEC) ine seataniko GSU Western Zone (West) Raksamgre Unit-ni President Tengroang Marak raken jegalataha.
GSU Phulbari Regional Unit aro GSU Western Zone (West) Raksamgre Unit batanggimin bilsirango dingtang dingtang zone-rangko bikotoba apsan melie kamrangko ka•ronga, indiba GSU Western Zone (North) Dadenggre-ni dilgiparangara maina gipin Zone-ni dilgiparango sing•cheng sanchenggija, Probash D. Sangma-ko skatang GSU Phulbari Regional Unit-ni Chief Eleksin Commissioner songskaha. Dadenggre Zone-ni indake darang zone-ni dilgiparangna kobor on•gija aro ku•mong meligija Probash Sangma-ko Chief Eleksin Commissioner (CEC) songaniara niamni kosako ong•a aro mandetangko seokaniara kraani ong•ja ine janapataha.
GSU Dadenggre Unit, maikai GSU Phulbari Regional Unit-ni President baksa maming agan golpogrikgija skatang Probash Sangma-ko CEC songaha ine Tengroang Marak sing•doangaha.
“Uamangni maming sing•sandia gri songbad-rango Probash D. Sangma-ko CEC ine parakataniara an•tangtangko niksengatna jotton ka•anisan ong•aia aro A•chik jatna namgniko ra•bana aro namgijaoniko chel•chakna kam ka•enggipa ong•ja aro GSU-ni gisepo gisik sa•dikgrikaona sokatenga. Uni gimin chinga GSU Western Zone (West) Raksamgre Unit, GSU Western Zone (North) Dadenggre Unit-ni indake tol•gipa kattako gipatanina suk ong•ja, uni gimin pilakan bebe ra•jachina sakantiko mol•molatna sika. Chinga uamangni sing•sandia gri gipin Zone-ni dilgiparangna kobor on•a gri sriksrik kam ka•e Probash Sangma-ko CEC songaniko ra•chakna man•jawa” ineba Tengroang Marak janapatkuaha.