Baghmara, May 29, 2022: Re•anggipa Bristibar salo Tura HQ-ni ADE, FKJGP- GHZ, AYWO aro FAF-ni President-rangko Tura-ni SP VS Rathore, kragija Thana-chi rimangani gimin South Garo Hills-ni NGO-rang raken jegalataha.
NGO-rang a•palchni ra•napbaenggipa biri packet-rango dam sea grigipa ba MRP grigipa birirang aro gipin bosturangko Garo Hills-o skatang palengani gimin, manderangni badi ka•atako man•sone, am•sandianiko dakahani gimin WGH-ni SP, NGO dilgiparangni kosako kragija sinjetaniko on•aniara ra•chakna amgijani ong•a ine NGO-rang suk ong•gijaniko ba namnikgijaniko parakataha.
“Chingni dilgiparangko niam gri badinggiparangna chake thana-ona rimanganiko chinga ADE Gasuapara Regional Unit, ADE Dalu Regional Unit, FKJGP Dalu Unit, ADE Baghmara Unit, ADE Rongara Regional Unit, FKJGP, AYWO aro FAF Southern Zone, Tura SP Vivekanand Singh Rathore-ni kamko chinga ra•chakna man•jawa” ine parakataha.
Ia niam gri bostu ra•bae palenggipa manderangna chake A•chik jatni kosako aro A•chik NGO-rangni dilgiparangko skatang thana-ona rimange donanira A•chik jatko mikchepe kam ka•aniko mesoka. Niam gri badingenggipa manderangko rim•ani pal bikpilsa manderangna, songsarna, jatna a•songna dangdike on•enggiparangko rim•aniara A•chik a•songo songdonggipa manderangni ra•chakna man•gijani ong•a ine South Garo Hills-ni NGO-rang ku•rang on•grimataha.
A•dok sorkari a•songo so•sojengjeng ong•anirangko chel•chakna, niamko ja•rike kamko ka•china gitasa pulis department-ko donengachim, indiba SP, VS Rathore-ni kamra manderangna ka•sae kam ka•enggipa gipin pulis official-rangna kratcha•anikosa ra•baskaa ine NGO-rang matnangataha.
“Chinga A•chik NGO-rang A•chik jatni namgnina, songsarna warachakna aro dakgrikna, chingni taningo ja•manchakjawa” ine NGO-rang ku•rang on•atan baksa mikkangchi indakgipa obostarang ong•taijachina aro songdonggipa manderangna ka•sae kam ka•pachina, songsarna nama chel•chakaniko on•china didiataha.
Pulis officer-rang indakgipa kamko ka•genchimode, A•chik a•songni manderanga sana ka•dongskagen, uni gimin mikkangchi name kam ka•china aro ong•gija kam ka•enggipa manderangna jak on•gija kakket aro bebeo sorkarini dongimin niam gita a•songni kosako niamko pe•e cha•ugipa, ra•seke ra•gipa, mande dokpretgipa, me•chik til•ekdragipa, mande so•otgipa aro gipin dingtang dingtang ong•gija kamrangko ka•enggipa manderangkosa rim•e sasti on•na nanga, indiba dos gri manderangni skatang ja•ku de•pajachina ADE Gasuapara Regional Unit-ni President Kellymeccan Ch Sangma jinmani palo mol•molataha.