GSU WZ-ni dilgiparangko Sindilgre songni Lilipson Sangma mittelata

Ampati, May 29, 2022: South West Garo Hills a•jani Salmanpara elakkani ning•o donggipa Sindilgre Govt.LP Skul-o skigipa donggija chipe donengani gimin, GSU Western Zone (South)-ni dilgiparang re•ange nieaha.

GSU-WZ, Ampati-ni President Salman D•Sangma aro GSU Salmanpara Regional Unit-ni dilgiparang adita salrangna skange re•ange sing•sandianiko dakahaon, Sindilgre Govt. LP Skulni gitcham skigipa gipin skulona kam ra•jitangni ja•mano da•alona kingkingba Sindilgre Skulo skigipa saksaba dongja ine nikna gita man•aha.
Indake Sindilgre Govt LP Skulo bilsigni batpile skigipa gri donani a•sel songni bi•sarangna dal•bea gimaani ong•aha. Ua skulo poraienggipa bi•sarang chel•begipa skulrangchi re•ange skie ra•na gita nangengaha aro mittamrang skul poraigija dontongna nangaha.
Ia obostani bidingo GSU WZ-ni dilgiparang South West Garo Hills a•jani Deputy Commissioner-ko gronge lekka sedoenba Sindilgre LP skulo ta•rake skigipako kamo rakkie on•china mol•molangaha.
Indake GSU dilgiparangni dingtangmancha Sindilgre songo neng•nikaniko nike DC-na lekka sedoatahani gimin, Sindilgre Govt LP Skulni President, Lilipson Sangma GSU dilgiparangna mittelpilani kattarangko parakatskaha.
Lilipson Sangma-ni parakatani gitade, Sindilgre Govt LP Skulni skigipa, Rakkim Marak skulni president, secretary aro songni manderangna maming u•iatgija an•tangni sika gita Sindilgre skuloni gipin skulona kam ra•jitangaha.
Indakeba skigiparang an•tangni sika gita education department-ni maming transfer order griba kamtangko ra•jitangna man•aiama ine Lilipson Sangma sing•doangahaha.
“Anga songni namnike Sindilgre Govt LP Skulni President songako man•gipa ong•a. Uni gimin, anga dingtangmancha GSU-WZ-ni dilgiparangko mol•molattaienga, ia Sindilgre Govt LP Skulo ta•rake skigipako ra•bana kamko ka•angpakuchina mol•molatna sika” ine Lilipson Sangma u•iataha.