Sora Complex-o gital M/S Studio Metamorph-ko a•bachengata
Tura, May 29, 2022: Tura-ni chadambe saksa Tra Rikamatchi D.Shira, District Commerce and Industries Centre (DCIC)-oniko PMEGP-ni scheme-ko man•ne kni tarani aro be•en bimangko simsakani ba Hair and Skin Care gital M/S Studio Metamorph dokkanko Tura-ni Sora Complex-o kuliaha.
Tra Rikamatchi D Shira-ni ia kamna gisiko nangbee jotton ka•anichi chu•sokaniko man•ahani gimin, West Garo Hills-ni DCIC kusi ong•chakaniko parakatenba una nama sikaniko on•angaha.
Studio-ni miksongara Eco Friendly bosturangko jakkale an•tangko sile tarie tilonge rongchingate rakkina gita manderangna dakchakaniko on•anggen ine parakataha.
M/s Studio Metamorph dal•dalgipa brandrang, jekai Casmara aro Naturica baksa bakrime Studio-ona re•bae an•tangko tarina sikgiparangna nambatgipa nonga sitaniko on•ne tarianiko dakanggen.
Ia Prime Minister Employment Generation Programme (PMEGP)-ara kam gri dongenggipa chadamberangna dake rike janggi tangchina, India Sorkarini on•enggipa Subsidy Scheme ong•a. Ia Subsidy-oniko man•gni dongan baksana 35% percent-ni gita tangkarangko sorkari gamna dakchakanggen.
Ia Scheme-ni gita Tura-ni DCIC a•doko kamrangko bang•e nakatatna aro tarie on•na gita raken kamrangko ka•enga ine parakataha.
A•chik songo kam tikgijagipa chadamberangna ia scheme-an mingsa namgipa chol ong•a aro ia scheme-na dorgastorangko galchina Tura-ni DC chadamberangko didiangaha.
Ia scheme-na galengon tangka kamainasan ong•aija, indiba sakgipinrangna kamrangko bikotkjolna krenge kamko ka•china Tura-ni DC Swapnil Tembe chadamberangko mol•molangaha.
Tra Rikamatchi D Shira-ni namgipa ja•kuko de•anina kusi ong•chakaniko parakate, nama sikani baksa mikkangchi uni re•mikanganirango chu•sokgipa ong•china DC agan ku•pattiangaha.