Tura, March 11, 2022: Meghalaya a•dokni sima ario ong•enggipa obostani bidingo Nokmarang aro Autonomous District Council-ni dilgiparang baksa chanchirimesa ja•kuko de•na nanga, ong•jaode Sixth Schedule-ni niamrangko nosto ka•a gita ong•gen ine Tura-ni BJP MDC, Bernard N.Marak parakataha.
Skang chengonin a•arang A•king Nokmarangni ning•osa ong•a ine Bernard Marak janapataha. A•dok sorkari mangmangde sima arini kajia golmalko namatna man•jawa, Meghalaya a•dok Sixth Schedule-ni ning•o donggipa a•ja ong•e Sixth Schedule-ni niam rettirangko ja•rika. A•king Nokmarang a•ani asol nokgiparang ong•a, uni gimin pilak kamrangon uamangni ku•pattianiko aro jechakani gri soi ka•gimin Certificate-ko nanga ong•jaode Constitutional Rights-ni niamrangko pe•a gita chacha ong•a.
Meghalaya aro Assam a•dok damgnini sima ario songdong a•chaenggipa manderang gisiktangtango kenchipchipe dongna nangao ga•akenga, mongsongbate Khasi Nokma-rangni ning•o ga•akgipa biapo songdong a•chaenggipa A•chikrang kenbatenga. Skotong Minister Conrad Sangma Meghalaya-ni bang•bata biaprangko galchanggen ine koborko man•soe sima ari jolo songdongenggipa manderang kene dongna nangenga ineba janapataha.
“An•chingni ma•gitcham pagitchamrangni a•arang, songni pokkrirang, ramarang, baganrang aro bang•a biaprang Assam a•dokni ning•osa ong•gnok ine Nokmarango aro MDC-rango maming sing•cheng sanchenggija Skotong Minister parakataha.
Politiks-ni dilgiparang, manderang tol•e cha•minoke BJP-ni bimingko pale cha•enga, uamang jatni dakbewal rikbewalko nisina jotton ka•e BJP-ko potenga. BJP dol manderang baksa ong•a aro uamangni man•gnina aro namgnina kamko ka•anggen.
Indakgipa sima arini golmalo A•king Nokmarangni aro ADC-ni manderangkosan ong•aigija, jinmani agananirang aro uamangni nangnikanirangkoba knachakna nanga ine Bernard Marak janapataha.