Darangniba dakchakaniko man•jae Bul A•kawe Secondary Skulko chipna ga•akaha
Baghmara, March 11, 2022: South Garo Hills a•jani ning•o donggipa Bul A•kawe songni Secondary Skul-ko kulianio bang•a neng•nikaniko man•ne chipna nangani a•selko Managing Committee parakataha.
Managing Committee-ni parakatani gitade, Bul A•kawe Secondary Skul-ko re•anggipa 2008 bilsio Meghalaya-ni gitcham Chief Secretary, Ranjan Chattarjee Chitmang Gonggrot-o koila cho•na am•aniko nina re•bae, Halwa-Attong songo tom•ani somoio ia jolo Secondary Skul ge•saba dongjani gimin Secondary Skulko kulichina didiangaha.
Ia jolorango bang•a neng•nikanirang donggenchimoba Secondary Skul ge•sako kulina nangchong•motenga ine nikenba wilwilao dongenggipa manderang 2011 bilsini March 15 tariko tom•e chanchirimaniko dakenba Bul-Akawe Secondary Skul-ko kuliaha.
Indake songni manderang 2011 bilsini April 5 tariko skulko oprake skul ka•na a•bachengaha. Iako oprake on•ani salo Rongrengre-ni MLA ong•enggipa Marcuis N.Marak mongsonggipa sokgipa ong•e, Baghmara-ni gitcham MLA Satto R. Marak dingtangmancha okamako man•ne ia skulko oprake on•anio dongpaaha.
“Chinga 2012 bilsini September 13 tariko class IX aro class X-na Sorkarini Opening Permission-ko man•aha aro Skulko a•bachenge kuliani somoio manderangni on•gila baksana angaba an•tangni bang•pagija dormahaoniko adita jarangna skigipa sak 3-na sakprako gong 5000 ka•e dormaha dake on•paaha” ine skulni President janapataha.
Indake ua somoio Sengbat R. Marak MDC-ba Skulko kulichengani somoio table chokkirangna adita tangkarangko on•ne dakchakpaaha aro Baghmara-ni gitcham MLA Satto R. Marak-ba adita tangka paisarangko on•ne Skulko tangatpana dakchakaniko on•paaha ine parakataha.
Ia Skuko kulianichi wilwilao donge poraienggipa chatro chatrirangna bang•a dakchakaniko on•pana man•aha aro ia Skulo poraie Matrict Pass ka•giparang me•asa sak 12 aro me•chik sak 7 gimik sak 19 ong•aha. Indake Skulni janggi tanga bilsi 11 ong•ahaoaba, sorkarini maming dakchakanirangko ba grant-rangko man•jaha ine u•iataha.
Uni gimin ia Skulko chalaiangkuna committee bang•a neng•nikanirangko man•ne ia bilsi dipet dontongna ba chipna gita nangengaha. Ian jolni manderangna namen dukni ong•aha aro jolni chadamberangna dal•bea gimaani ong•aha ine Bul A•kawe Secondary Skul-ni President suk ong•gijaniko parakataha.
Indakgipa obostako kobor man•soe Bul A•kawe Secondary Skulni President baksa songbad setimgiparang adita sing•anirangko dakahaon, committee-ni parakata gitade, skulni committee-rang da•o ong•enggipa Rongara-Siju-ni MLA, Rakkam A.Sangma-ko gronge, ia skulna sorkarini grant-rangko dake on•pachina mol•molahachim, indiba sorkarini maming grant-rang aro dakchakanirangko man•jahani gimin ia bilsidipet skulko chipna nangengaha ine aganataha.