Tura, March 18, 2022: Tura-ni MDC Bernard N Marak Bristibar salo dol gittam melie 2014 bilsio soi kagimin aro uamangni chanchie tik ka•gimiko, A•chik Nokmarangna tangka on•ne bon•chipatna jotton ka•enga ine matnangaha.
Bernard Marak-ni janapata gitade, “Sorkari uamangni agreement-o soi ka•giminko mande ra•ja baksana kakketko jegale songni Nokma-rangko niam gri VEC-ona rimnapna aro ma•mong sorkariniko VEC-ko Rural Local Bodies ine sejotako man•na dabianio Nokmarangko bak dongatpana jotton ka•enga. Iandakgipa sorkarini kamara ra•chakna man•gijagipa ong•a. Agreement-ko semike Nokmarangko brangate roa gita ong•a. Sak ritchani ritcha Nokmarangko sorkari tangka gri okamatenba uamangni poket-na gong hajar 2-ko on•ne uamangko sorkarini proposal-ko ra•chakchina didiangaha, iano Nokmarang maming namdapanikoba man•jawa, indiba sorkarisa namgniko man•gen. Sorkarini indakgipa kamrangara Nokmarangni bilko gimaatna kam ka•a gita ong•a. VEC-de jatni dakbewal rikbewalko ripingnagipa ong•ja. Nokma-rangko VEC-ni Chairman songgen ine agananiara agreement see soi ka•gimin kattarangni kosako re•dapa gita ong•a” ine Bernard Marak parakataha.
VEC-de Local Body ong•ja, indiba a•doko MGNREGA-ko kam ka•atna dikdiksa somoina ra•bagipsan ong•aia. VEC-ko sorkari bang•a kamrangna segatjaha, uni a•selo Autonomous District Council (ADC)-ni gita Rural Local Body-rangna sokatgipa tangkarangko maming dakeba golmal ka•na nangja. Sorkari Rural Local Body-na minge sokbagipa tangkarangko ra•sekdrana aro Nokmarangko rimnapna jotton ka•enga.
Nokmarang uamangni namgijana miksonge uamangko melimike rimnapna am•aniko jechakna nanga ine Bernard Marak didiangaha.