Baghmara, March 18, 2022: South Garo Hills a•jani Silkigre Pulis Out Post-ni ning•o donggipa Silki Ampangdamgre songo mingsa aiao inmangipa a•sel ong•aha ine kobor man•aha.
Kobor man•soani gitade, pagipa an•tangni bilsi 3 ong•gipa demechikko ka•saninggija so•otaha.So•otako man•ne sianggipa bilsi 3-ni me•chik bi•sako Chidime Ch Sangma ong•achim. Ua Ma Chensilitha Ch Sangma aro Pa Lindrid N.Sangma-ni gittamgipa demechik ong•achim.Lindrid Sangma re•anggipa bilsioni sko tik ong•gija sae dongengachim ineba kobor man•aha. Ua de•mechikko so•otanio Lindrid Sangma-an ong•chongmota ine songni manderang u•iataha. Ua an•tangni demechikko so•otani ja•mano kate dongenga ine kobor man•soaha.Ia a•selni bidingo songni Nokma Presingson P Marak Silkigre Pulis Outpost-ona re•ange koborko on•eaha. Indake ka•saninggija pagipani jakchi so•otako man•ne sianggipa me•chik bi•sani manggisiko Baghmara Civil Hospital-o Post-Mortem ra•angaha aro WGH a•jani Crime Scene Unit-ni manderangba a•sel ong•gipa biapona sokangaha ineba u•iataha.
Ia a•selni bidingo talbate ma•sina sing•sandianirangko dakengaha aro jinmani chanchichipako man•gipa Lindrid N Sangma-koba sandina a•bachengataha ine u•iataha.