All India Trinamool Congress Meghalaya (AITC-M) Sonibar salo AITC North Shillong Block Committee-ko songaha ine koborna parakataha.
Indake, Elgiva Gwyneth Rynjah-ko AITC North Shillong Block Committee-ni President seokaha. AITC dolni dilgipa Dr Mukul Sangma, “AITC a•doko dingtanganiko ra•bana kamko ka•enga aro ia dingtanganiko ra•bana an•tangko on•kange kamko ka•angna ku•mitchetgipa mande sakantikon chinga jechakgija rimchaksoa” ine aganaha.
AITC dolni MLA George B Lyngdoh, TMC batanggimin bilsi 13-ni gisepo West Bengal a•doko bang•a dingtanganiko aro a•doko silroroataniko ra•baaha. Uandake Meghalaya a•dokoba AITC dingtangatna aro namdapatna kamko ka•anggen. Chinga darangkoba mikkang nigija kakketo re•mikkanggen. AITC dolni nissano donggipa chin jean samsini ge•gni pulrang ong•achim, ia samsini pul darangkoba mikkang nitegija apsan ong•grikaniko aro galonna man•giparangko ra•dopiltaina kam ka•aniko miksonga ine aganangskaha.