Goalpara, Oct 11, 2022: Re•anggipa October 1 tariko Assam a•dokni skul chatri saksako sakgittam Muslimrang kragija drae til•ekani bidingo jegale da•al Monggolbar salo Goalpara a•jani Cholipara playground-o dingtang dingtang skulni chatro chatrirang, NGO-rang, songni manderang duko ga•akgipa me•chikna kakket bichalko on•china dabie jinma re•jomaniko dakangaha.
Dos dakgipa sakgittam Muslimranga Mohammad Alom, Akash aro Azibul skuloni re•bapilenggipa A•chik me•tra saksako drae til•ekaha.
Jingjengataniko ong•atdilgipa NGO-ranga GNC, Garo Jatiya Parishad, GSU, AHAM aro GNU raken jegalaniko dakenba dos dakgipa manderangna rakgipa sastiko on•china dabiangaha.