Skotong Minister Tura A•konggre-o rikgipa commercial complex-ko oprake on•anga
Tura, Sept 2, 2022: Meghalaya a•dokni Skotong Minister, Conrad K Sangma, Skotong Minister-ni Chief Adviser Thomas A.Sangma, West Garo Hills a•jani Deputy Commissioner Swapnil Tembe, Tura-ni SP Vivekanand Singh Rathore, TMB-ni CEO Rikse R.Marak, line department-ni Official-rang, gittimni dilgiparang aro senior citizen-rangni dongpanio ba mikkango September 2 tarik Sukrobar salo Urban Affairs Department-ni Tura A•konhgre-o rikgipa Commercial Facility-Cum-Parking Lot-ko oprake on•angaha.
Skotong Minister tom•bagipa manderangna aganprakengon, Tura songjinma Garo Hills-ni gitchambatsranggipa skotong songjinma ong•genchimoba ru•uta bilsirangna maming tang•dodapani aro namroro silroroatanirangko ra•bagija galchipe donaha. Indiba MDA sorkari bilona re•baani ja•mano Tura songjinmako namdapatna kamrangko ka•enga ine aganangaha.
Skotong Minister-ni aganangani gitade, Smart Town Project-ni ning•o, Tura songjinmako nitodapatna aro Tura-ni dingtang dingtang gittimrangni ramarangko namdapatna a•dok sorkari tangka gong kror 55-ko koros ka•aha. Unbaksana tangka gong kror 15-ko gital ramarangko tarina aro gong kror 13-ko gitcham ramarangko taridapatna tangkarangko on•ataha.
A•dok sorkari Tura songjinmao ringani china neng•nikaniko man•engani gimin, 60 ba 70 percent china neng•nikaniko namatna kamrangko ka•aha. Uandake Tura songjinmako apbalbate nitodapatna gnigipa phase-ko ka•anggen aro Tura bajarni ramako apbalbate taridapna gong kror 5 ba 6 tangkarangko nangdapkugen. Unbaksana gittimantion solar street light-rangko ching•ate Tura songjinmako nitoadapatgen, uni gimin Tura songjinmako namdapatna kam ka•anio manderang apsan ku•monge kam ka•aniko nangenga ine Skotong Minister aganangaha.
Tura songjinmao maini a•sel bosturangni damrang tang•doenga ba barienga, bading chiwalgiparang, pulis aro district administration baksa apsan ku•monge sandianiko dakenba manderangna dakchake chel•chakaniko on•china gitaba Skotong Minister didiangaha.
Skotong Minister Tura songjinmani gimin aganengon, Tura songjinma Salgro Salaram a•dokrangni gisepo ge•sa nambatsranggipa songjinma ong•gen aro songjinmako nitoatna nambatgipa solid waste management-ko nangenga ine an•tangni niksamsoaniko aganangaha.
Skotong Minister-ni Chief Adviser Thomas A.Sangma, uni kan•dikgipa agananio Tura songjinmako mikkangchi namroro silroroatna sorkari raken ja•ku de•enga. Uni gimin Tura songjinmani manderang development-ni rengsiko ra•bana apsan ku•monge kamrangko ka•na nangenga ine aganangskaha.
West Garo Hills a•jani Deputy Commissioner, Swapnil Tembe, Tura-o bangbanggipa biaprang dongjaha aro Tura bajar namen apchangket ong•a. Maibakai gital commercial complex-ko rikna nangode namen neng•nikani ong•gen. Uni gimin pilak palgipa sim•giparang, badinggiparang aro ramasamo palgiprang TMB-ni ge•etgipa niamrangko ja•rikchina didiangaha.
Indake tom•ni miksongako Urban Affairs Department-ni Joint Director B Lapo aganangengon, TMB-ni CEO Rikse R.Marak rimchaksoani kattarangko aganangaha. Bon•kame mittelpilani kattarangko District Urban Planner, HPN Sangma aganangskaha.