Jasani ja•man ku•sik srange aganna man•gijagipa disable me•chik jailoni joka  

Tura, Sept 4, 2022: Re•anggipa July 22 tarik Sukrobar attamni 6:30 bajimango pulisrang Rimpu Bagan (RB)-ko rang•gitik chadrape sandianiko dakenba Rimpu Bagan-o kusi ong•e, roenggipa manderangko rim•e pattoko donatgipa manderangoni me•chik saksade Disable ong•achim aro Ku•sik srange aganna man•jachim.

Pulisrang Rimpu bagano me•chikrangko pale cha•enga ine chanchichipanio chadrapaha. Indaken Rimpu bagano roenggipa bang•a manderangko rim•e pattoko donataha.

Rim•a man•gipa manderangko Tura Women Pulis Station-ni Me•chik Pulis Officer Incharge, Mamta Hajong bang•a me•chikrangko statement ra•anio an•tangtangko Rimpu Bagano an•tangtangko badita tangkana palenga, salo badita sak me•asa baksa roenga, me•asa saksaoniko badita tangka ra•enga, walgimiko badita ra•enga ine ku•sik seltagija kattarangchi sing•aha. Uni sing•anina aganchakjaode, bail ba jamin on•jawa ine ka•mikkenataha.

“Chinga pale cha•gipa ong•jani gimin, maidake una tol•e ku•rachakgen. Chinga cha•ani cha•e ronasa mikchatang baksa Rimpu Bagan-chi re•anga, denggu dake rona re•angja. Maini gimin Mamta Hajong chingko ong•gija kamo galone ku•rachakchina draachim, chingade ma•sija. Chinga uni tol•e, tol•e sing•anina maiko tol•e ku•rachakgen. Chingni ku•rachakjani giminsa chingni kosako tol•e case tarie chingko jail watata” ine rim•ako man•gipa me•chikrang kobor ra•timgiparangna aganaha.

Indake ong•engon, ku•sik srange ba rongtale aganna man•gijagipa me•chikkoba notti dari dake an•tangko Rimpu Bagano pale cha•enga ine dos galdrake pattoko donataha. Ua me•chik maming dos gri ja 1 sal 10 pattoko dongani ja•man Septembar 3 tarik Sonibar salosa pattokoni jokaha. Mitam uni ripengrang saoba sal 15, saoba sal 12, saoba sal 5 sal 6 pattoko donge pattokoni jokbatokaha, indiba da•alona kingking saksako jailoni watkuja ine duko ga•gipa me•chik aganaha.

Ua (disable) me•chikni aganani gitade, Mamta Hajong, Rimpu Bagano badita tangkana an•tangko palenga ine sing•aha. “Angade angni mikchagipa baksasa dikdiksa rona re•anga aro angade ian skanggipa re•anga, una skangba re•anga dongja. Ua Angni ku•sik srange aganna man•jani giminba ka•dingsteke chonnike roaha. Angade Rimpu Bagano me•chikrangko pale cha•enga ineba ma•sija, manderangni cha•ani cha•na re•angani giminsa biap an•sengakon ine nina gitasa re•anga ine aganoba, kakketko aganjaode, bail on•jawa ine ka•mikkenataha. Una agreba angko jail warden me•chik angni aganako ma•sijae angni natengko bil•gni satkapaha” ine duko ga•akgipa me•chik aganaha.

Ua me•chikni pagipani agana gitade, “Angni demechik rasong gri atchienba bi•saonin ku•sik name aganna man•ja. Ua pulis officer-ni sing•aniko rongtale aganchakna man•jaenggen. Indiba Nokgipa Isolni ka•saachi ua poraianio graduate ong•paha. Ua poraia matchotani ja•mano Skotong Minister Conrad Sangma-ni Tura Dakkopgre-o a•bachengate on•anggipa DDU-GKY skill trainingo jabri skie ra•a matchotani ja•mano Chennai songjinmaona okamatako man•ne, uni ripengskarang sak 30 baksa skie ra•na re•angaha. Indake Chennai-oni re•bapile dongengmittingo, uamangna Chennai-o skie on•gipa Principal nangni Certificate-ko Tura Centre-oniko ra•ebo ine aganatani gimin Certificate ra•e uni segipa baksa Rimpu Bagan-o rona re•angaha. Indake pulisrangni raid ka•anio ban cha•aha. Pulisrang Rimpu Bagan-o roenggipa manderang baksa apsan rim•e, Tura thana-ona rimange, uamangko niam gita kakket aro bebeo statement ra•gija, ong•gija aro kragija statement-ko ra•e, bon•kamao pattokona watataha. Me•chik pulis officer, Mamta Hajong kragija statement-ko ra•e, angni demechikko notti dari dake an•tangko pale cha•enga ine dosi galdrakaha aro angni demechik ku•sik name aganna man•jani gimin ka•dingsteke roaha. Unbaksana jailona sokangon, me•chik jail warden name aganchakna man•jani gimin, angni demechikko natengo bil•gni satkapaha. Pulisrang disable mandeko dos galdrae pattok donataniara, pulis officer-ni dal•a gualani ong•a. Sorkarini niamo disable mandeko kal•ake aro doke rona man•jachim. Indiba pulis officer niamko pe•e, angni demechik mai obostao janggi tangengachim uko name sandichenggija pattoko chipatani gimin, anga pagipa ong•e, pulis me•chik officer-ni ong•gija kamna suk ong•ja. Unbaksana mahari ma•drangna aro songsalna kratcha•ani ong•a. Chinga ma•gipa pagipa ong•e ia me•chik bi•sani obostako ma•sia. Uni gimin kakket bichal ka•genchimode, angni demechik indakgipa obostao ga•akjawachim. Angni demechik namgijako ba gualaniko dakama dakja namedake kakket bichal ka•esa, gualani dongode niam gita jekoba dakna man•a. Indiba me•chik pulis officer-ni kamara kakket statement-ko ra•gija, namgija kamo galone dos gri disable mandeko pattoko donaha. Uni gimin mikkangchi angni demechiksan ong•aigija, gipin disable ong•gipa manderangko niam gita kakket bichal ka•esa, disable manderangko mai dakna nanga kamko ka•angchina aro mikkangchi dos gri manderangni kosako ong•gija kamrangko ka•angtaijachina” mechikni pagipa pulisrangko aro jailo nitimgiparangko mol•molataha.