Tura, August 13, 2022: Meghalaya a•dokni Skotong Minister Pa Conrad Sangma, Chief Adviser Thomas A. Sangma, Asananggre elekkani MDC Anseng A. Sangma, NHM Mission-ni Director Ram Kumar S, West Garo Hills a•jani Deputy Commissioner Swapnil Tembe, TMB Chairman JD Sangma-ni dongpanio ‘Chief Ministers’ Safe Motherhood Scheme’ (CMSMS)-ni gita Transit Home (TH)-ko Rongram C&RD Block-ni ning•o donggipa Asananggre songo August 12 tarik Sukrobar salo oprake on•angaha.
Skotong Minister Conrad Sangma jinmana aganprakengon, “an•chingni a•doko an•o kegipa ma•giparang aro atchigital bi•sarangni siani namen bang•beenga. Indiba da•alo CMSMS-ni Transit Home donganichi bang•a ma•giparang aro bi•sarangni janggirangko jokatna dakchakani ong•gnok. Covid-19 sabisi a•dokona sokbaani ja•mano a•dokni bang•a health service-rangko tang•dodapatna nangenganiko nikna man•aha. Indake sorkari tangka gong kror 350-ko on•ne Health Service-ko tang•dodapatna aro namdapatna chamaha” ine aganangaha.
Skotong Minister-ni Chief Adviser Thomas A. Sangma, “CMSMS-ni ning•o tarigipa ge 80 Transit Home-rang a•doko gnang. Indake an•o kegipa ma•giparangna aro atchidaldal bi•sarangni janggina simsake Transit Home-rangko a•bachengate on•enggipa Skotong Minister-ko uni namgipa kamna anga bilongen mittela. Uandake Asananggre songo transit home-ko oprake on•anganichi wilwilao dongenggipa pilak ma•giparangna bang•a dakchakani ong•gnok” ine aganangskaha.
WGH a•jani District MCH Officer Dr Ivonne Sangma-ba transit home-ni bidingo agantalate on•angaha.
Indake bon•kamao DM&HO Dr. Bijoy Debbarma mittelpilani kattarangko aganne tom•aniko matchotataha.