Tura, August 13, 2022: Meghalaya a•dokni TMC dilgiparang West Khasi Hills a•jao Mawshynrut TMC Block Committee-ko Sukrobar salo songe on•angaha ine u•iataha.
West Khasi a•jani bang•a manderang TMC-o bakrime uamangni neng•nikanirangko namatna kamko ka•angna miksonganiko parakataha.
Ia tom•anio TMC dolni dilgipa Dr. Mukul Sangma, Mawshynrut songni TMC dilgipa Justin G Momin aro gipin membor-rang bakko ra•angaha.
Dr Mukul Sangma, jinmana aganprakangengon, 2018 bilsio BJP dolni dilgiparang Meghalaya a•dokona re•bae Conrad Sangma-ko a•dokni Skotong Minister songe donangaha. Indake ua salonin da•alona Conrad Sangma BJP dolni ning•o donge uamangni ge•etaniko ja•rikenga. Home Minister Amit Shah a•dokona re•bae sima arini bidingo Conrad Sangma baksa agangolpogrikangaha, indake uamangni grongrika jasa ja•man, Skotong Minister Conrad Sangma, Assam-ni Skotong Minister baksa Border Agreement-o ba MoU-o soi ka•aha. Indiba da•alo NPP dolrang BJP dolko jakwate re•baenggipa 2023 bilsini eleksino chakatna miksongenga. NPP eleksinna skang bang•a ku•chakanirangko dakaha, indiba uamang an•tangni ku•chakatangkon da•ona kingkingba chu•sokate on•kuja. Uamangni kamko niatgenchimode, bang•a ku•rachaknirangko chu•sokate on•kujaenga. Indakgipa dolko an•ching mikkangchiba dilgipana seoktaigenchimode, an•chingni a•dok maming dakeba tang•dodapna man•jawa. India a•song Democratic a•songsa ong•a, uni gimin dilgiparangko seokna an•chingni jako ong•a. An•chingni a•dok chigako ripingna aro jatni niam retiko chasongni chasongna rakkiangna jinma krenge kamko ka•na kang•kare kagipa mandekosa an•ching basena nanga. Eleksin-ni somoio bang•a kamrangko ka•na ku•rachake bilsi 5-ona kingkingba ku•chakatangko chu•sokatgijagipa dolko an•chingna nangja. BJP-ni mikkangko ning•o donnue, NPP-ni noksako jinmana mesoke manderangko cha•bokenggipa dol an•chingna maming namdapaniko ra•bajawa. NPP an•chingna neng•nikanikosa ra•baenga” ine Dr Mukul Sangma aganangaha.
Mawshynrut elekkani TMC dilgipa Justin G Momin, uamangni MLA NPP dolni Gigur Myrthong-ko matnange, “An•ching elekka-ni MLA an•chingna maming namdapaniko aro tang•dodapaniko ra•bakuja. An•ching nokoni ong•kate ramarango aro office-rangchi re•ange nion skangni salrang gita apsankon nikna gita man•kugen. Mawshynrut elekka, Assam a•dok baksa sima ariko sualgrika, indiba maming tang•dodapani dongja aro bang•a poraie matchotgipa chadamberang kam gri dongna nangenga” ine aganaangha.
TMC Mawshynrut Block Committee-ko nokdonggae on•angengon, bang•a manderang bakko ra•angtokaha. Indake ia tom•anio, TMC dolni dilgiparang kangkare kae jatna warachakna aro kamko kaangna ku•mitchetangaha ine parakataha.