Tura, Aug 13, 2022: GSU-CEC aro gipin NGO-rang apsan bakrime, Garo Hills gimiko MeECL Office-ko salgnina Office Picketing ka•ani Sukrobar salo tom•tome matchotangaha.
Garo Hills gimiko bijoli ching•a tik ong•jani gimin NGO-rang batanggimin salrango a•dok sorkarina aro department-ni bil gnanggiparangna lekka sedoatahachim, indiba maming aganchakaniko man•jahani gimin GSU-CEC, Tura aro gipin NGO-rang tom•e chanchirimaniko dakenba August 11 aro 12 tarikrango salgni joljol Office Picketing-ko ka•angaha.
Indiba NGO-rangni dabianina a•dok sorkari maming aganchakaniko on•kuja. Indake ong•engon, “Chinga India a•songni jakgittel ong•ani salko respect ka•e, August 15 tariko maming jingjengataniko dakjawa aro sorkarini ku•rang on•aniko sengenga. Uni gisepon August 15 tarikni ja•mano maming aganchakaniko on•ja ong•ode, chanchirimaniko dake mikkangchi rakbata ja•kurangko de•anggen” ine GSU President Zikku Balgra N.Marak aganaha.
NGO-rangni MeECL Office-ko Picketing ka•ani miksongara, Garo Hills-o chu•onga gita kam ka•giparangko kamo rakkichina, Khasi Hills-o kamna seokode, Garo Hills-oba seokchina aro job reservation-o pangchake Khasi Jaintia-na 40 percent Garo-na 40 percent-ko apsangrik kamo rakkichina dabiengaha.
Batanggimin somoio Junior Engineer-na sak 52 Khasi Jaintia-ko kamna seokaha, indiba Garo-rangoniko saksakoba kamna seokjaha. Uni gimin Meghalaya a•doko songdongenggipa jatgittam manderangoniko darangkoba mikkang nitegija apsangrik kamna seokchina NGO-rang dabiangaha.
Maina da•oni chasong susaani somoi ong•aha, chadamberang dingtang dingtang porikkarangko sesusana gita poraisoaniko dakenga, uni gisepon bijoli tik ong•gija ching•a, kimita dakgenchimode chadamberangni gisiko nannge consentrate ka•mittingo bijoli sichange on•ode, gisikrang bringbranga aro neng•nikaniko man•ne poraianiko dontongaona sokata. Iadandakgipa obostarangni a•sel A•chik chadamberang pangnan ja•manchakaniko man•ronga. Indakgipa susaanirango namedake an•tangtangko tarisona man•jani a•sel bang•bata somoirangon chadamberang susaanio chu•sokna man•rongja. Uni gimin poraienggipa chadamberangna maming neng•nikani gri poraina gita Garo Hills-o bijoliko tik ong•e on•pachina NGO-rang MDA sorkariko mol•molataha.